Qazaqstan men Qytaı mádenı alys-beristiń jańa taraýyn bastady
ASTANA. KAZINFORM — Qytaı medıakorporatsııasy elordada «Tatý kórshilik qarym-qatynastyń jańa kezeńi» atty Qytaı-Qazaqstan mádenı almasý forýmyn ótkizdi. Onda Qytaı medıakorporatsııasy jasaǵan «Sı Tszınpınniń súıikti qanatty sózderi» telebaǵdarlamasynyń qazaq tilindegi nusqasy tanystyryldy.
Óz sózinde QR Mádenıet jáne aqparat mınıstri Aıda Balaeva Qytaıdyń tatý kórshi ǵana emes, san jyldyq tarıhy bar uzaq merzimdi strategııalyq áriptes ekenin erekshe atap ótti.
«Bul tarıhı baılanys ortaq múddege, ózara qurmetke, eki el damýynyń dańǵyl jolyna, beıbit bolashaǵyna negizdelgen. Bıyl Qazaqstan men Qytaı arasynda dıplomatııalyq qarym-qatynastardyń ornaǵanyna 32 jyl tolyp otyr. Bizdiń baılanysymyz Shyǵys halyqtaryna tán shydamdylyq pen ózara qurmetke jalǵasyp, eń qıyn bolyp kórinetin máseleler men jaǵdaılarda ymyraǵa kelip, sheshim, tabý, dıalog júrgizý dástúri berik ornaǵan», — dedi spıker.
Onyń aıtýynsha, sońǵy jyldary Qazaqstan men Qytaı arasyndaǵy yntymaqtastyq pen strategııalyq qarym-qatynas múldem jańa deńgeıge kóterildi.
«Eki memleket basshylarynyń arqasynda qarym-qatynastar áriptestiktiń joǵary deńgeıine kóterilip, tatý kórshilikti odan ári nyǵaıtý men ózara tıimdi yntymaqtastyqta damytýǵa júıeli negiz qalandy. QHR tóraǵasy Sı Tszınpınniń Qazaqstanǵa qazirgi memlekettik sapary sondaı-aq Prezıdent Qasym-Jomart Toqaevtyń Qytaıǵa jaqynda jasaǵan memlekettik sapary dostyǵymyzdy jańa deńgeıge kóterdi. Bul týraly sarapshylar qaýymynyń ǵana emes, qalyń jurtshylyqtyń da shynaıy qyzyǵýshylyǵyn týdyrǵan Memleket basshysynyń Sınhýa aqparat agenttigine bergen súbeli suhbatynda jáne QHR tóraǵasynyń QazAqparat agenttigine bergen baǵdarlamalyq maqalasynda aıtyldy», — deıdi A. Balaeva.
Aqparat mınıstri yntymaqtastyǵymyzdyń óte mańyzdy aspektisi — mádenı saladaǵy berik baılanys ekenin jetkizdi.
Atap aıtqanda, shyǵarmashylyq toptardyń qoıylymdary, mýzeı kórmeleri, kórkem ekspozıtsııalar, kınoındýstrııadaǵy jańa fılmderdiń kórsetilimi, eskertkishterdiń ashylýyn uıymdastyrý óte mańyzdy.
Óz kezeginde Qytaı medıakorporatsııasynyń bas dırektory jáne bas redaktory Shen Haısıýn 4 saǵat buryn Sı Tszınpınniń resmı bortymen Astanaǵa ushyp kelgenin jáne Qazaqstan óte jyly qabyldaǵanyn aıtty.
«Árıne, biz bul is-sharaǵa erekshe mán beremiz. Qazaqstannyń Memleket Basshysy Qasym-Jomart Toqaevqa alǵys bildirgim keledi. Osyndaı úlken aýmaqta biz shyn máninde óte meıirimdi adamdardyń ómir súretinin kórip otyrmyz. Búgin biz Qytaıdyń medıakorporatsııasy atynan sizdermen osy forýmda bas qostyq. Meniń oıymsha, bul qarym-qatynasymyzdyń jańa kezeńiniń bastamasy bolady. Qazaqstan men Qytaı — tatý kórshi memleketter. Bizdiń tarıhymyz myńdaǵan jyldarǵa ulasady. Bizdiń aýmaqtan Uly Jibek joly ótti», — dedi Shen Haısıýn.
Ol 2013 jyly Qytaıdyń tóraǵasy Sın Tszınpın alǵash ret «Bir beldeý, bir jol» ıdeıasyn usynǵanyn eske saldy. Sońǵy 11 jylda Qazaqstan men Qytaı osy joba aıasynda jumys júrgizýde.
«Búgin biz „Sı Tszınpınniń súıikti qanatty sózderi“ baǵdarlamasynyń úshinshi maýsymyn qazaq tilinde bastaımyz. Baǵdarlama QHR Tóraǵasynyń mańyzdy sózderinde, maqalalarynda jáne áńgimelerinde keltirgen klassıkalyq qytaı shyǵarmalarynan alynǵan dáıeksózderdi jınaqtaǵan. Bul habarlar baı ári tereń qytaı dástúrli mádenıetiniń jańa dáýirdegi maǵynasyn, jahandyq qundylyǵyn ashady. Bul Qytaıdyń ótkenin, búginin jáne bolashaǵyn kórsetetin klassıkalyq sózder. Qytaı búkil adamzat úshin beıbitshilik pen órkendeý sııaqty qundylyqtardy nasıhattaıdy. Ony Qazaqstannyń basty aqparat quraldary kórsetedi», — dedi Qytaı medıakorporatsııasynyń basshysy.
