Qazaqstan men Qytaı «Qorǵas» ortalyǵyndaǵy qaýipsizdikti kúsheıtpek
ASTANA. KAZINFORM – Qazaqstan men Qytaı «Qorǵas» halyqaralyq shekara mańy yntymaqtastyǵy ortalyǵynda qaýipsizdik pen qoǵamdyq tártipti qamtamasyz etý úshin birlesip jumys istemek. Osyǵan qatysty kelisimdi ratıfıkatsııalaý týraly zań jobasy «Ashyq NQA» portalynda jarııalandy.
Kelisim Qazaqstan men Qytaıdyń quzyrly organdarynyń ortalyq aýmaǵynda qaýipsizdik pen quqyqtyq tártipti qamtamasyz etý baǵytyndaǵy yntymaqtastyǵyna quqyqtyq negiz qalyptastyrady.
Qujatta ortalyq aýmaǵynda jasalýy múmkin quqyq buzýshylyqtardyń aldyn alý, olardy anyqtaý, jolyn kesý jáne tergep-tekserý kezinde eki eldiń quzyrly organdarynyń ózara is-qımyl jasaý tártibi qarastyrylǵan.
Sondaı-aq taraptar ulttyq qaýipsizdikti qamtamasyz etý, izdeýde júrgen adamdardy izdestirý jáne ustaý, ortalyq aýmaǵyndaǵy azamattar men uıymdardyń múlkin qorǵaý máseleleri boıynsha birlesedi.
Budan bólek qoǵamdyq tártipti saqtaý, jol qozǵalysyn retteý, ortalyqtyń ınfraqurylymyn kútip ustaý jáne onyń jumysyn baqylaý máseleleri boıynsha konsýltatsııalar ótkizý kózdelgen.
Eki eldiń quzyrly organdary óz zańnamalaryna súıene otyryp, bir-birine resmı saýal joldaý arqyly jumys isteıdi. Al ulttyq qaýipsizdikke qatysty mańyzdy aqparatty qajet bolǵan jaǵdaıda saýal kútpeı-aq ózara bólise alady.
Zań jobasy qoǵamdyq talqylaýǵa shyǵaryldy. Talqylaý 18 qarashaǵa deıin jalǵasady.
Buǵan deıin Qazaqstan men Qytaı «Qorǵas» ortalyǵyndaǵy qaýipsizdik máselelerimen qatar, júrgizýshi kýálikterin ózara taný jóninde de kelisimge kelgen bolatyn.
