Qazaqstan men Qytaı kásipkerleri Qonaev qalasynda jańa zaýyt salady
ASTANA. KAZINFORM – Qonaev qalasynda tamshylatyp sýarý júıeleriniń qosalqy bólshekterin shyǵaratyn zaýyt ashylady. Sý resýrstary jáne ırrıgatsııa mınıstri Nurjan Nurjigitov Qonaev qalasyndaǵy tamshylatyp sýarý júıelerine arnalǵan qosalqy bólshekter shyǵaratyn zaýytty aralap kórdi. Bul týraly atalǵan mınıstrliktiń baspasóz qyzmeti málimdedi.
Tamshylatyp sýarý ádisi – tirshilik nárin tikeleı ósimdik tamyryna jetkizý arqyly sýdy uqypty paıdalanýǵa múmkindik beredi. Zaýyt – qazaqstandyq jáne Qytaı kásipkerleriniń birlesken jobasy. Kásiporyn qýaty aptasyna 500 gektarǵa deıin jerdi tamshylatyp sýarý tehnologııasymen qamtamasyz etýge jetedi dep josparlanyp otyr.
Aldaǵy ýaqytta Taraz qalasynda da osyndaı zaýyt ashý josparda bar. Odan keıin, Nurjan Nurjigitov Sheńgeldi aýylyndaǵy №5 sorǵy stantsııasyn aralady. Nysan jeke menshikte. Qazirgi ýaqytta ony keshendi rekonstrýktsııadan ótkizip, memlekettik menshikke berý máselesi pysyqtalyp jatyr.
Mınıstr Almaty oblysy Raıymbek, Kegen, Talǵar, Іle, Jambyl jáne Uıǵyr aýdandary men Sarybulaq aýylynyń sýarý jelilerin jańǵyrtý boıynsha túzetilgen josparmen tanysty.
Jobalardy iske asyrý merzimi – 8 aıdan 2 jylǵa deıin. Sondaı-aq mınıstr Almaty oblysynyń ákimdigi men sýmen jabdyqtaý jáne sý únemdeý salasyndaǵy jetekshi qytaılyq kompanııalardyń ókilderi arasyndaǵy kezdesýge qatysty. Kásipkerler basqa elderde júzege asyrǵan jańa ázirlemeleri men jobalary týraly aıtyp berdi.
Kezdesý qorytyndysy boıynsha Almaty oblysynyń ákimdigi men qytaılyq kompanııalar arasynda óńirde sý únemdeý tehnologııalaryn engizý boıynsha memorandýmǵa qol qoıyldy. Sheteldiktermen kezdesýden soń, Almaty oblysynyń ákimi Marat Sultanǵazıev jáne Aýyl sharýashylyǵy mınıstri Aıdarbek Saparovtyń qatysýymen jınalys ótti. Nurjan Nurjigitov baıandama jasap, el aýmaǵynda sýdy jınaý jáne ony únemdeý boıynsha mınıstrliktiń júrgizip jatqan is-sharalary týraly aıtyp berdi. Baıandamalardan keıin eki mınıstr de jergilikti sharýalar men kásipkerlerdiń suraqtaryna jaýap berdi.
