Qazaqstan men Qytaı karbamıd zaýytyn birlesip salady

ASTANA. KAZINFORM – Qytaı Halyq Respýblıkasynyń Tóraǵasy Sı Tszınpınniń Qazaqstanǵa resmı sapary aıasynda Qazaqstan Energetıka mınıstrligi, Qytaıdyń CNPC korporatsııasy, «QazMunaıGaz» ulttyq kompanııasy» AQ jáne Aqtóbe oblysynyń ákimdigi arasynda karbamıd zaýytynyń qurylysyn kózdeıtin ınvestıtsııalyq jobany iske asyrý jóninde negizdemelik kelisimge qol qoıyldy.

Energetıka mınıstrligi málimetinshe, atalǵan joba munaı-gaz hımııasy salasyndaǵy Qazaqstan men Qytaı arasyndaǵy eń iri birlesken kásiporyndardyń biri bolmaq. Bul strategııalyq áriptestiktiń jarqyn úlgisi retinde el ekonomıkasyn ártaraptandyrýǵa, agroónerkásiptik keshendi damytýǵa jáne azyq-túlik qaýipsizdigin nyǵaıtýǵa baǵyttalǵan.

Qujatqa qol qoıý – jobany iske asyrýǵa qatysty negizgi máseleler boıynsha qol jetkizilgen ýaǵdalastyqtardyń zańdy jalǵasy: shıkizatpen qamtamasyz etý, jobalyq aldyndaǵy kezeńdi aıaqtaý, tehnıkalyq-ekonomıkalyq negizdemeni ázirleýdi bastaý jáne «Aqtóbe» AEA aıasynda jer telimin bólý.

Zaýyt Aqtóbe oblysynda, Jańajol gaz óńdeý zaýytynyń (JGÓZ) mańynda salynady. Shıkizatpen qamtý osy JGÓZ bazasynda júrgiziledi jáne jylyna 600 mln m³ deıin taýarlyq gaz jetkiziledi dep josparlanyp otyr.

Zaýyttyń jobalyq qýaty – jylyna 800 myń tonnaǵa deıin karbamıd óndirý. Jalpy ınvestıtsııa kólemi – 1,25 mlrd AQSh dollary. Jobany iske asyrý merzimi – 2024–2029 jyldar.

Qurylys kezeńinde 3 000-ǵa deıin, al paıdalaný kezeńinde 400-ge jýyq jumys orny ashylady dep josparlanǵan.

Joba «Aqtóbe» AEA quramyna engizilgen. Bıyl Qazaqstan Prezıdenti janyndaǵy Ulttyq ǵylym akademııasymen birlesip tyńaıtqyshtyń agrotekseristeri elimizdiń tórt óńirinde júrgizildi.

«Karbamıd» jobasyn iske asyrý – otandyq gaz hımııasyn damytýǵa, azyq-túlik qaýipsizdigin arttyrýǵa jáne Qazaqstannyń eksporttyq áleýetin keńeıtýge eleýli úles bolmaq.

Aıta keteıik, Aqtóbede qoı júnin óńdeıtin zaýyt salynady.