Qazaqstan men Qytaı ınvestıtsııalardy ózara qorǵaý týraly kelisimdi jańartady

ASTANA. KAZINFORM — Premer-mınıstrdiń birinshi orynbasary Roman Sklıar «Ortalyq Azııa — Qytaı» ekinshi ındýstrııalyq-ınvestıtsııalyq yntymaqtastyq forýmynda Qazaqstan men Qytaı ınvestıtsııalardy ózara qorǵaý týraly kelisimdi jańartatynyn málim etti. 

— Búgin Qytaı Úkimetimen Investıtsııalardy kótermeleý jáne ózara qorǵaý týraly jańartylǵan kelisimge qol qoıylady. Bul qujat qytaılyq ınvestorlardyń bizdiń elimizde jumys isteýine burynǵydan da qolaıly jaǵdaı jasaıdy.

Biz árbir ınvestordy jeke qoldaý jáne súıemeldeý qaǵıdatyn engizdik. Salyqtan, kedendik bajdan bosatý, zattaı grant berý, ınfraqurylym máselelerin sheshý sııaqty jeńildikter kózdelip otyr, — dedi ol.

Vıtse-premer Qytaı ınvestorlaryn Qazaqstan ekonomıkasyna alańsyz ınvestıtsııa quıýǵa shaqyrdy.

— Qytaılyq seriktesterdi Qazaqstanda jáne Ortalyq Azııa elderinde bıznesti damytý úshin qolda bar múmkindikterdiń bárin paıdalanýǵa shaqyramyz. Búgingi is-sharalar iskerlik toptyń barlyq ókilderi úshin yntymaqtastyqtyń jańa múmkindikterin ashatynyna senimdimin, — dedi Roman Sklıar.

Eske salsaq, buǵan deıin Qazaqstan ekinshi AES salatyn konsortsıýmnyń tizginin Qytaıǵa berýge nıetti ekenin málim bolǵan edi.