Qazaqstan men Qytaı ınnovatsııalyq qalalardy damytý baǵytynda yntymaqtastyqty kúsheıtedi
ASTANA. KAZINFORM — Qytaıǵa jumys sapary aıasynda Qazaqstan Respýblıkasy Premer-mınıstriniń orynbasary Qanat Bozymbaev Shenchjen qalasynyń meri Tsın Veıchjýnmen kezdesý ótkizdi. Bul týraly Úkimettiń baspasóz qyzmeti málim etti.
Taraptar ınvestıtsııalar tartý, ınnovatsııalyq ekojúıelerdi damytý, qalalyq basqarýdy tsıfrlandyrý jáne zamanaýı tehnologııalardy engizý máselelerin talqylady. Kezdesýde Qazaqstannyń jańa ekonomıkalyq ósý ortalyǵy retinde Alataý qalasyn damytý jáne básekege qabiletti qalalardy qalyptastyrýdyń halyqaralyq tájirıbesin zerdeleý máselelerine erekshe nazar aýdaryldy.
Qanat Bozymbaev Qazaqstan men Qytaıdyń strategııalyq áriptestikti dáıekti túrde nyǵaıtyp kele jatqanyn atap ótti.
— 2025 jyldyń qorytyndysy boıynsha eki el arasyndaǵy taýar aınalymy rekordtyq $48,7 mlrd-qa jetti. Al 2005–2025 jyldar aralyǵynda Qytaıdyń Qazaqstan ekonomıkasyna salǵan ınvestıtsııa kólemi $29 mlrd-tan asty, — delingen habarlamada.
Kezdesý barysynda Alataý qalasynyń arnaıy quqyqtyq rejımi men damý modelin ázirleý kezinde álemdik ozyq tájirıbeler, sonyń ishinde birneshe jyldar ishinde ınnovatsııalar men joǵary tehnologııalar jáne kásipkerlik salasyndaǵy jetekshi álemdik ortalyqtardyń birine aınalǵan Shenchjen tájirıbesi eskerilip jatqany atap ótildi.
Shenchjen qalasynyń meri Tsın Veıchjýn Qazaqstannyń Alataý qalasyn qurý jónindegi bastamasyn joǵary baǵalap, yntymaqtastyqty keńeıtýge qyzyǵýshylyq bildirdi. Onyń aıtýynsha, jańa býyn jobalaryn tabysty júzege asyrý uzaq merzimdi strategııalyq kózqarasty, ınvestıtsııalar úshin ashyqtyqty jáne ınnovatsııalardy júıeli túrde engizýdi talap etedi.
Qanat Bozymbaev Shenchjen kompanııalary men damý ınstıtýttaryn jasandy ıntellekt, tsıfrlyq ınfraqurylym, logıstıka, jasyl energetıka jáne joǵary tehnologııalyq óndirister salalaryndaǵy Alatau City jobalaryn júzege asyrýǵa qatysýǵa shaqyrdy.
Kelissózder qorytyndysy boıynsha taraptar Shenchjen men Alataý qalalary arasyndaǵy ınvestıtsııalyq jáne iskerlik yntymaqtastyqty odan ári damytýǵa daıyn ekendikterin rastady.
Buǵan deıin QR Premer-mınıstriniń orynbasary Qanat Bozymbaev Almaty metrosy ázirge Alataý qalasyna deıin sozylmaıtynyn aıtty. Úkimet bul baǵytta metronyń ornyna LRT jelisin damytýdy josparlap otyrǵanyn jetkizdi.
