Qazaqstan men Qytaı energetıka salasyndaǵy birlesken jobalardy jedeldetpek
ASTANA. KAZINFORM — Qazaqstan Respýblıkasy Premer-mınıstriniń birinshi orynbasary Nurlybek Nálibaevtyń tóraǵalyǵymen munaı-gaz salasyndaǵy Qazaqstan-Qytaı yntymaqtastyǵy jónindegi jumys tobynyń besinshi otyrysy ótti. Bul týraly Úkimettiń baspasóz qyzmeti málim etti.
Otyrysqa energetıka mınıstri Erlan Aqkenjenov, Qytaı ulttyq munaı-gaz korporatsııasynyń (CNPC) basshysy Chjoý Sınhýaı, eki eldiń ulttyq munaı-gaz kompanııalarynyń basshylary men ókilderi qatysty.
Taraptar munaı-gaz, energetıka salalaryndaǵy ekijaqty yntymaqtastyqtyń qazirgi jaı-kúıi men damý perspektıvalaryn, buryn qol jetkizilgen ýaǵdalastyqtardyń oryndalý barysyn talqylady.
Nurlybek Nálibaev Qazaqstan men Qytaı arasyndaǵy jan-jaqty strategııalyq áriptestiktiń joǵary deńgeıin atap ótip, energetıka salasyndaǵy birlesken jobalardy ýaqtyly júzege asyrýdyń mańyzdylyǵyna toqtaldy.
Otyrys barysynda taraptar munaı jetkizý kólemin ulǵaıtý, munaı qubyrlarynyń ótkizý qabiletin keńeıtý, geologııalyq barlaý jumystaryn jandandyrý, gaz salasyndaǵy yntymaqtastyqty damytý, Shymkent munaı óńdeý zaýytynyń qýatyn keńeıtý, munaı-gaz hımııasy jobalaryn júzege asyrý jáne jańa energetıka baǵyttaryndaǵy ózara is-qımyl máselelerin talqylady.
— Jer qoınaýyn paıdalaný salasyndaǵy yntymaqtastyqty jalǵastyrý, qoldanystaǵy kelisimsharttardyń merzimin uzartý men birlesken jobalardy júzege asyrý barysynda týyndaıtyn máselelerdi sheshý joldary qaraldy, — delingen habarlamada.
Otyrys qorytyndysy boıynsha Nurlybek Nálibaev birlesken jobalardy júzege asyrýdy jedeldetýdiń, ózekti máseleler boıynsha ózara tıimdi sheshimder qabyldaýdyń, qol jetkizilgen ýaǵdalastyqtardyń ýaqtyly oryndalýyn qamtamasyz etýdiń mańyzdylyǵyn atap ótti.
