Qazaqstan men Qytaı ekijaqty áskerı yntymaqtastyq josparyna qol qoıdy
ASTANA. KAZINFORM - Astanaǵa Qytaı Halyq Respýblıkasynyń qorǵanys mınıstri admıral Dýn Tszıýnniń basshylyǵymen kelgen áskerı delegatsııa Qazaqstannyń Qorǵanys mınıstrliginde boldy.
QR Qorǵanys mınıstrligi baspasóz qyzmetiniń habarlaýynsha, general-polkovnık Rýslan Jaqsylyqov áriptesin QHR Qorǵanys mınıstri laýazymyna taǵaıyndalýymen quttyqtady.
– Sizdiń bul laýazymdaǵy alǵashqy saparyńyz Qazaqstannan bastalýynyń ózindik máni bar. Bul eki el arasyndaǵy úlken senim men dostyq qarym-qatynastyń belgisi. Osy oqıǵa qorǵanys vedomstvolary arasyndaǵy ǵana emes, eki el arasyndaǵy yntymaqtastyqty nyǵaıtatynyna senimdimin, – dep atap ótti ol.
Qazaqstannyń Qorǵanys mınıstri vedomstvolardyń birlesken oqý-jattyǵýlar ótkizýge múmkindikteri, sol sııaqty kadrlardy oqytý, mádenıet jáne sport salasyndaǵy baılanystardy keńeıtý turǵysynan áleýeti bar ekenin atap ótti.
Kezdesý barysynda Qazaqstan men Qytaı qorǵanys vedomstvolarynyń basshylary general-polkovnık Rýslan Jaqsylyqov pen admıral Dýn Tszıýn ekijaqty qatynastardyń qazirgi jaı-kúıin jáne olardy damytý kókjıegin talqylady.
Admıral Dýn Tszıýn suhbattasýshyǵa rızashylyǵyn bildirip, qorǵanys vedomstvolary arasyndaǵy yntymaqtastyqty tereńdetý jáne damytý nıetin qoldady.
– Qorǵanys mınıstrleri retinde ekijaqty qarym-qatynasty nyǵaıtýda bizge júktelgen úlken mıssııa bar. Meniń saparym ShYU-ǵa múshe memleketter qorǵanys mınıstrleriniń keńesi aıasynda ótip jatyr. ShYU aıasyndaǵy ózara qarym-qatynasty nyǵaıtý – basym mindetterdiń biri, – dedi admıral Dýn Tszıýn.
Ol Shanhaı Yntymaqtastyq Uıymyna tóraǵalyq etý aıasyndaǵy Qazaqstannyń eleýli jumysyn atap ótti.
Kezdesý sońynda qorǵanys vedomstvolary Qazaqstan men Qytaı arasyndaǵy 2024 jylǵa arnalǵan ekijaqty áskerı yntymaqtastyq josparyna qol qoıdy.
Qytaı qorǵanys vedomstvosynyń basshysy admıral Dýn Tszıýn QR Qorǵanys mınıstrliginiń Qurmetti qonaqtary kitabyna qoltańba qaldyrdy.
