Qazaqstan men Qytaı birlesken Sýtegi tehnologııalary ortalyǵyn iske qosty
ALMATY. KAZINFORM – Almatyda Qazaqstan-Qytaı Sýtegi tehnologııalary ortalyǵynyń resmı ashylý rásimi ótti. Bul týraly Energetıka mınıstrliginiń baspasóz qyzmeti habarlady.
Mańyzdy is-sharaǵa QR Energetıka mınıstri Erlan Aqkenjenov, Shanhaı meri Gýn Chjen, QR Ǵylym jáne joǵary bilim mınıstri Saıasat Nurbek, sondaı-aq QazUÝ rektory Janseıit Túımebaev qatysty.
Ortalyqtyń qurylýy – elimizde irgeli ǵylymdy, bilim men naqty óndiristi biriktiretin zamanaýı tehnologııalyq ekojúıeni qalyptastyrýǵa baǵyttalǵan tikeleı qadam. Kezdesý barysynda Energetıka mınıstri Erlan Aqkenjenov jetekshi sheteldik seriktestermen ıntegratsııalaný salanyń damý qarqynyn aıtarlyqtaı jedeldetýge múmkindik beretinin atap ótti.
– Sýtegi energetıkasy bizdiń sektordy damytýdyń strategııalyq baǵyttarynyń biri bolyp tabylady. 2024 jyly qabyldanǵan Tujyrymdama ekonomıkany dekarbonızatsııalaýǵa baǵyttalǵan jańa salany qalyptastyrý úshin quqyqtyq jáne ekonomıkalyq baza qalady. Jańa ortalyq jańa formattaǵy ınjenerlerdi daıarlaýǵa, qoldanbaly zertteýler júrgizýge jáne ınnovatsııalardy óndiriske jedel engizýge arnalǵan basty beıindi alańǵa aınalýy tıis, - dep atap ótti Erlan Aqkenjenov.
Ál-Farabı atyndaǵy Qazaq ulttyq ýnıversıteti, Shanghai Jiao Tong University jáne Energy China International korporatsııasy arasyndaǵy úshjaqty memorandýmǵa qol qoıylýy Ortalyq jumysynyń praktıkalyq irgetasy boldy. Qujat aýqymdy ǵylymı-tehnıkalyq ózara is-qımyldy damytýǵa jáne ozyq sheshimder transferine baǵyttalǵan.
Kelisim aıasynda taraptar birlesken zertteýler júrgizýge, sýtegi tehnologııalaryn synaqtan ótkizýge jáne eksperımentaldy pılottyq jobalardy iske qosýǵa ýaǵdalasty. Ǵylymı jańalyqtardy kommertsııalandyrýǵa jáne olardy Qazaqstan aýmaǵyndaǵy ónerkásiptik jobalarǵa biriktirýge erekshe nazar aýdaryldy. Sondaı-aq mamandarmen belsendi akademııalyq almasý kózdelgen.
Sýtegi energetıkasyn damytý – jahandyq energııaǵa kóshýdiń negizgi elementteriniń biri. Qazaqstan baı resýrs bazasy men jańartylatyn energııa kózderi sektorynyń qarqyndy ósýi arqasynda bul baǵytta aıtarlyqtaı áleýetke ıe. Qytaılyq tehnologııalyq kóshbasshylarmen seriktestik respýblıkanyń jańa energetıkalyq naryqtardaǵy pozıtsııasyn nyǵaıtyp, ındýstrııalyq ınnovatsııalardyń engizilýin jedeldetedi.
Buǵan deıin Qazaqstan men Belarýs akademııalyq baılanystardy keńeıtetinin jazǵanbyz.
