Qazaqstan men Qytaı birlesken astyq saýda platformasyn qurdy
ASTANA. KAZINFORM — Aýyl sharýashylyǵy vıtse-mınıstri Ermek Kenjehanuly Qytaı Halyq Respýblıkasynyń Azyq-túlik jáne strategııalyq rezervter jónindegi memlekettik basqarmasynyń (NAFRA) basshysy Lıý Hýansınmen kezdesti. Bul týraly vedomstvonyń baspasóz qyzmeti málim etti.
Kelissózder barysynda taraptar ekijaqty yntymaqtastyqtyń qazirgi ahýaly men damý perspektıvalaryn, aýyl sharýashylyǵy ónimderiniń ózara saýdasyn keńeıtý, ınvestıtsııalyq jobalardy júzege asyrý jáne azyq-túlik qaýipsizdigin nyǵaıtý máselelerin talqylady.
Ermek Kenjehanuly Qytaı Qazaqstannyń agrarlyq saladaǵy negizgi strategııalyq seriktesteriniń biri ekenin atap ótti.
— Ótken jyly eki el arasyndaǵy aýyl sharýashylyǵy ónimderiniń taýar aınalymy 36,8%-ǵa ósip, 1,97 mlrd AQSh dollaryn qurady. Al bıylǵy jyldyń qańtar–naýryz aılarynda bul kórsetkish 61,7%-ǵa artyp, 697 mln dollarǵa jetti, — dep habarlady mınıstrlikten.
Byltyr Qytaıǵa eksporttalǵan agroónerkásip kesheni ónimderiniń kólemi 35,3%-ǵa ósip, 1,43 mlrd AQSh dollary boldy. Negizinen mal azyǵy, ósimdik maılary, zyǵyr jáne kúnbaǵys tuqymdary, raps maıy eksporttaldy. Aǵymdaǵy jyldyń alǵashqy úsh aıynda eksport kólemi 82,4%-ǵa artyp, 550 mln dollardy qurap otyr.
Qazirgi ýaqytta eki el arasynda aýyl sharýashylyǵy ónimderiniń 34 túrin eksporttaýǵa qatysty hattamalarǵa qol qoıylǵan. Onyń ishinde ósimdik sharýashylyǵy ónimderiniń 21 túri jáne mal sharýashylyǵy ónimderiniń 13 túri bar. Qytaıǵa ónim tasymaldaýǵa ruqsat etilgen tizilimge 3601 kásiporyn engizilgen.
Óz kezeginde Lıý Hýansın eki el arasyndaǵy agrarlyq yntymaqtastyqtyń áleýeti joǵary ekenin aıtyp, Qytaı tarapy sapaly ónimderdi turaqty jetkizýge qyzyǵýshylyǵy zor ekenin jetkizdi.
— Qazaqstan Qytaı úshin azyq-túlik qaýipsizdigin qamtamasyz etý men aýyl sharýashylyǵy ónimderin jetkizýdiń turaqty tizbekterin damytýda mańyzdy seriktes sanalady. Biz astyq saýdasy, logıstıka jáne qaıta óńdeý salalaryndaǵy yntymaqtastyqty nyǵaıtýǵa, saýdany keńeıtýge jáne birlesken jobalardy qoldaýǵa daıynbyz, — dedi NAFRA basshysy.
Kezdesý barysynda astyq pen maıly daqyldardy uzaq merzimdi kelisimsharttar arqyly jetkizý múmkindikterine, logıstıkalyq habtar men «qurǵaq porttardy» qurýǵa, sondaı-aq aýyl sharýashylyǵy ónimderin saqtaý jáne óńdeý tehnologııalarymen almasýǵa erekshe nazar aýdaryldy.
Kelissózder kezinde astyq saýdasyndaǵy tsıfrlyq quraldardy damytýǵa aıryqsha nazar aýdaryldy. Qazaqstan tarapy Qytaıdyń astyq saýdasyna arnalǵan tsıfrlyq platformany engizý tájirıbesin zerdeleýge yntalylyq tanytty.
— Kezdesý sońynda birlesken qazaq-qytaı astyq saýda platformasyn qurý týraly kelisimge qol jetkizildi. Joba «Bir beldeý, bir jol» bastamasy aıasynda Qytaı men Ortalyq Azııa elderiniń is-qımyl josparyna sáıkes júzege asyrylady, — delingen habarlamada.
Bul alań Qytaı tarapynyń qoldanystaǵy Ulttyq ınternet-astyq saýda platformasy negizinde qurylyp, eki eldiń bıznes ókilderine básekeli saýda-sattyq pen tikeleı kelissózder arqyly mámileler jasaýǵa múmkindik beredi.
Negizgi ónim túri soıa men basqa da maıly jáne maı óndirýge arnalǵan daqyldarǵa baǵyttalady.
Sonymen qatar, Qazaqstannyń Aýyl sharýashylyǵy mınıstrligi men NAFRA arasynda ózara túsinistik týraly memorandýmǵa, sondaı-aq «Azyq-túlik kelisimshart korporatsııasy» UK» aktsıonerlik qoǵamy men NAFRA janyndaǵy Astyq saýdasyn úılestirý ortalyǵy arasynda yntymaqtastyq týraly kelisimge qol qoıyldy.
Buǵan deıin Qazaqstan men Grýzııa arasyndaǵy agroónerkásiptegi ózara saýda 116 mln dollarǵa jetkenin jazǵan edik.
