Qazaqstan men Qytaı birge salǵan «Lý Ban» sheberhanasy ınjenerlerdi qalaı daıyndaýda — fotoreportaj
ÓSKEMEN. KAZINFORM — Memleket basshysy Qasym-Jomart Toqaev pen Qytaı Tóraǵasy Sı Tszınpınniń kelisimi negizinde Óskemendegi D. Serikbaev atyndaǵy ShQTÝ bazasynda «Lý Ban» sheberhanasy ashylǵan bolatyn. Jańa býyn ınjenerlerin daıarlaıtyn osynaý ortalyqtyń jumys istep turǵanyna jarty jylǵa jaqyndap qaldy. Kazinform tilshisi sonda baryp, qazirgi nátıjelermen jáne aldaǵy josparlarmen tanysyp qaıtty.
Qasym-Jomart Toqaev 2023 jyldyń 18-19 mamyrynda Qytaıdaǵy «Qazaqstan — Ortalyq Azııa» sammıtinde Qytaı Halyq Respýblıkasynyń Tóraǵasy Sı Tszınpınmen Qazaqstan aýmaǵynda mashıný jasaýdyń zamanaýı sheberhanasyn ashý jaıly kelisimge keldi.
Sodan soń ShQO ákimdigi men QHR-dyń Tıantszın qalasynyń bıligi arasynda «Lý Ban» sheberhanasyn qurý týraly kelisimshartqa qol qoıylyp, Shyǵys Qazaqstan tehnıkalyq ýnıversıteti men Tıantszın kásiptik ınstıtýty (TVI) arasynda memorandým jasaldy.
Sol jyldyń tamyz aıynda ýnıversıtettegi 15 oqytýshy Tıantszınge sapar shegip, óz biliktilikterin arttyryp keldi. Al jeltoqsan aıynda Óskemende sheberhana resmı túrde ashyldy.
Osylaısha, «Lý Ban» sheberhanasy ortalyq Azııa elderi arasynda alǵash ret óz jumysyn bastady.
Munda ınjenerlerdi búkilálemdik CDIO bastamasy aıasynda oqytady. Stýdentter elektr stansalary men akkýmýlıatorlyq batareıalardy jóndeýge mashyqtanyp, mashına jasaýdyń qyr-syryn meńgeredi.
Zamanaýı sheberhanada joǵarǵy oqý ornyndaǵy «Kólik, kólik tehnıkasy jáne tehnologııalary», «Tasymaldaýdy, qozǵalysty jáne kólikti paıdalanýdy uıymdastyrý» mamandyqtarynyń 400-ge jýyq stýdenti bilim alýda.
«Lý Ban» sheberhanasynyń 4 zerthanasy bar. Birinshisi — janarmaıly qozǵaltqyshty avtokólikterge tehnıkalyq qyzmet kórsetý, jóndeý jáne dıagnostıkalaý. Ekinshisi — dástúrli avtokólik júıelerin sımýlıatsııalyq synaý.
Úshinshisi — elektromobılderge jáne gıbrıd kólikterge tehnıkalyq qyzmet kórsetý, jóndeý jáne dıagnostıkalaý.
Tórtinshisi — avtokólikterdiń SMART-tehnologııalary.
«Prezıdent Qasym-Jomart Toqaev 2024 jyldyń aqpan aıynda osynda kelip, sheberhana jumysymen tanysyp, joǵary baǵasyn berdi. Sheberhana jastarymyzǵa naryqtaǵy ozyq tehnologııalarmen jumys isteýdi qalaı úıretýge bolatyndyǵyn kórsetip berdi. Joǵary bilikti mamandar Qazaqstannyń túkpir-túkpirindegi kompanııalarǵa jumysqa ornalasyp, munda úırengenderin kádege jaratatynyna senimimiz kámil. Álem boıynsha barlyǵy 30-ǵa jýyq „Lý Ban“ sheberhanasy bar. Aldaǵy ýaqytta Qazaqstanda taǵy da sheberhanalar ashylady dep kútilýde. Biz óz tájirıbemizben bólisýge qashanda ázirmiz», — deıdi ShQTÝ akademııalyq máseleler jónindegi prorektory Ásııa Mashekenova.
Ýnıversıtette 15-ten astam jańa pán engizilip, olardyń mazmuny elektromobılderdi, gıbrıdti kólikterdi jáne dástúrli kólikterdiń SMART tehnologııalaryn zertteýge baǵyttalǵan.
«Astana Motors» kompanııasy da JOO-men kelisimge kelip, óz qyzmetkerlerin sheberhanaǵa oqýǵa jiberip, ortaq jobalardy qolǵa alýǵa nıetti.
Ýnıversıtet oqytýshylary da biliktilikterin arttyrýdy jalǵastyryp, osy jáne kelesi jyly da Tıantszın kásiptik ınstıtýtyna barady.
«Lý Ban» sheberhanasy bizge ınnovatsııalyq múmkindikter ashyp, jańa qurylǵylarmen tanysýǵa jaǵdaı jasady. Oqý barysynda kóp dúnıeni úırenip, bilmegenimizdiń jaýabyn osynda taýyp jatyrmyz. Kóliktiń kishkentaı bir bólsheginen bastap úlken qozǵaltqyshyna deıin qolmen ustap kórip, onyń qalaı jumys isteıtinimen tanysýdamyz. Elektromobılder qurylymyn búge-shúgesine deıin bilip, olarǵa qalaı qyzmet kórsetýdi meńgerýdemiz. Dıplom alǵan soń kóliktik tehnıka qoldanylatyn zaýyttardyń birine jumysqa turýdy josparlap otyrmyn», — deıdi «Kólik, kólik tehnıkasy jáne tehnologııalary» mamandyǵynyń 3-kýrs stýdenti Qýandyq Manapov.
Qoryta ketsek, bul sheberhana Qazaqstanda elektromobılder shyǵaratyn zaýyttarda jumys isteıtin suranysqa ıe ınjenerlik kadrlardy daıarlaýda.
Aldaǵy ýaqytta «Smart Driving Technology» ınjınırıngtik ortalyǵy qurylyp, akademııalyq jáne ǵylymı-zertteý aspektileri boıynsha elektrmen jumys isteıtin kólik jabdyqtaryn shyǵaratyn zaýyttarmen yntymaqtastyq ornatylady dep kózdelip otyr.
Óz jemisin berip jatsa alda Qazaqstannyń basqa da óńirlerinde osyndaı sheberhanalar boı kótermek.