Qazaqstan men Qytaı bıopestıtsıdterdi birlesip ázirleýge kiristi
ASTANA.KAZINFORM - Qazaqstan Respýblıkasy Prezıdenti Qasym-Jomart Toqaev pen Qytaı Halyq Respýblıkasynyń Tóraǵasy Sı Tszınpınniń ǵylymı-tehnıkalyq yntymaqtastyqty nyǵaıtý jónindegi ýaǵdalastyqtaryn iske asyrý aıasynda Qazaqstan men Qytaı ósimdikterdi bıologııalyq qorǵaý salasyndaǵy birlesken jobalardy júzege asyrýǵa kiristi.
QR Aýyl sharýashylyǵy mınıstrligi baspasóz qyzmetiniń habarlaýynsha, «Ulttyq agrarlyq ǵylymı-bilim berý ortalyǵy» mekemesi, J. Jıembaev atyndaǵy Qazaq ósimdik qorǵaý jáne karantın ǵylymı-zertteý ınstıtýty jáne Qytaı aýyl sharýashylyǵy ǵylymdary akademııasynyń Ósimdikterdi qorǵaý ınstıtýty ózara túsinistik týraly úshjaqty memorandýmǵa qol qoıdy.
Qujat zamanaýı bıopestıtsıdterdi birlesip ázirleýdi, ozyq tehnologııalar transfertin júzege asyrýdy, Qazaqstanda ósimdikterdi bıologııalyq qorǵaý quraldarynyń óndirisin jergiliktendirýdi, sondaı-aq joǵary bilikti mamandar daıarlaýdy maqsat etedi.
Memorandýmǵa Qazaqstanǵa Qytaı aýyl sharýashylyǵy ǵylymdary akademııasynyń Ósimdikterdi qorǵaý ınstıtýty, Qytaı aýyl sharýashylyǵy ýnıversıteti (CAU) jáne Zhongbao kompanııasy delegatsııasynyń sapary aıasynda qol qoıyldy.
Taraptar birlesken ǵylymı zertteýler júrgizýdi, ósimdikterdi qorǵaýǵa arnalǵan jańa bıologııalyq quraldardy ázirlep, synaqtan ótkizýdi, ǵylymı ázirlemeler men tehnologııalar almasýdy, akademııalyq utqyrlyq pen kadrlar daıarlaý baǵdarlamalaryn iske asyrýdy, sondaı-aq perspektıvaly ǵylymı ázirlemelerdi kommertsııalandyrýǵa járdemdesýdi josparlap otyr.
Yntymaqtastyqtyń basym baǵyttarynyń biri Qazaqstan aýmaǵynda zamanaýı bıopestıtsıdter óndirisin jolǵa qoıýǵa jaǵdaı jasaý. Jobany iske asyrý ekologııalyq qaýipsiz ósimdik qorǵaý quraldaryn qoldaný aıasyn keńeıtýge, ımportqa táýeldilikti tómendetýge, otandyq agroónerkásiptik keshenge ınnovatsııalyq sheshimderdi jedel engizýge jáne onyń básekege qabilettiligin arttyrýǵa múmkindik beredi.
Qazaqstan men Qytaıdyń jetekshi ǵalymdary men sarapshylaryn biriktirgen «Zııandy organızmderdi basqarý júıesi» atty halyqaralyq ǵylymı-tájirıbelik semınar barysynda ósimdikterdi ıntegratsııalanǵan qorǵaýdyń zamanaýı tásilderi, zııankestermen kúrestiń bıologııalyq ádisterin damytý perspektıvalary, fıtosanıtarııalyq ahýaldy monıtorıngteýdiń ınnovatsııalyq tehnologııalaryn engizý, sondaı-aq birlesken ǵylymı-zertteý jobalaryn iske asyrý tetikteri talqylandy.
-Sapar aıasynda Qytaı delegatsııasy qazaqstandyq ǵylymı uıymdardyń qyzmetimen tanysyp, asa qaýipti zııandy organızmderge monıtorıng júrgizýdiń zamanaýı tehnologııalaryn zerdelep, sondaı-aq agroónerkásiptik kásiporyndardyń tynys-tirshiligimen tanysady,-delingen habarlamada.
Osyǵan deıin Qazaqstan men Qytaı shekara mańyndaǵy ken oryndaryn birlesip ıgerýi múmkin ekeni týraly jazdyq.
