Qazaqstan men Qytaı bıologııalyq qaýipsizdik salasynda halyqaralyq zerthana ashty
ASTANA. KAZINFORM- Qazaq ulttyq agrarlyq zertteý ýnıversıtetiniń (KazNARU) bazasynda Qytaı ǵylym akademııasynyń akademıgi Gao Fý atyndaǵy halyqaralyq zerthananyń saltanatty ashylý rásimi ótti, dep habarlaıdy QR Aýyl sharýashylyǵy mınıstrliginiń baspasóz qyzmeti.
Jańa ǵylymı ortalyq KazNARU, Qazaqstan Respýblıkasy Prezıdentiniń janyndaǵy Ulttyq ǵylym akademııasy, Chjetszıan ýnıversıteti jáne Qytaı ǵylym akademııasynyń Mıkrobıologııa ınstıtýty arasynda jasalǵan uzaq merzimdi ǵylymı yntymaqtastyq týraly memorandým aıasynda quryldy.
Halyqaralyq zerthana Qazaqstan men Qytaıdyń bıologııalyq qaýipsizdik, mıkrobıologııa jáne «Birtutas densaýlyq» (One Health) tujyrymdamasy baǵytyndaǵy birlesken ǵylymı zertteýlerin júzege asyratyn negizgi ǵylymı alań bolmaq.
Zerthanada jańa jáne qaıta taralyp jatqan ınfektsııalyq aýrýlardy zertteý, zoonozdyq ınfektsııalarǵa monıtorıng júrgizý, molekýlalyq dıagnostıka men genomdyq zertteýlerdiń zamanaýı ádisterin ázirleý jáne óndiriske engizý, sondaı-aq bıologııalyq qaýipsizdikti qamtamasyz etýge arnalǵan tehnologııalardy jasaý jáne jetildirý jumystary júrgiziledi.
-Halyqaralyq zerthananyń ashylýy qazaqstandyq ǵalymdarǵa Qytaıdyń jetekshi ǵylymı ortalyqtarymen birlesken zertteýler júrgizýge, ozyq tehnologııalar men halyqaralyq ǵylymı yntymaqtastyq jelilerine qol jetkizýge jol ashady,-delingen habarlamada.
Birlesken jobalar Qazaqstannyń ǵylymı áleýetin nyǵaıtyp, bıologııalyq qaýipsizdik salasynda ozyq ǵylymı ázirlemelerdi engizýdi jedeldetedi. Sonymen qatar bul bastama otandyq ǵalymdardyń densaýlyq saqtaý, veterınarııa jáne azyq-túlik qaýipsizdigi baǵytyndaǵy jahandyq ǵylymı mindetterdi sheshýge belsendi qatysýyna yqpal etedi.
Aıta keteıik, osyǵan deıin 1,3 mln gektar aýyl sharýashylyǵy alqaby shegirtke qarsy óńdelgeni týraly jazǵan edik.
