Transkaspıı dálizi: Qytaı-Qazaqstan-Eýropa baǵytyndaǵy alǵashqy kólik kerýeni attandy
ASTANA. KAZINFORM – Búgin Aqordada Memleket basshysy Qasym-Jomart Toqaev pen Qytaı Halyq Respýblıkasynyń Tóraǵasy Sı Tszınpın Transkaspıı dálizi arqyly Qytaı-Qazaqstan-Eýropa baǵytyndaǵy alǵashqy kólik kerýenin saltanatty túrde attandyrdy.
Kólik kerýeniniń sapary 10 kúnge sozylady, uzyndyǵy - 4 800 shaqyrym. Kerýen Qazaqstannyń 8 óńirinen ótip, búgin Quryq portyna jetti. Bul baǵyt Qytaı men Qazaqstan arasynda ekonomıkalyq jáne saýda yntymaqtastyqty odan ary damyta túsedi.
«Qytaı elinen shyqqan júk - avtokólik kerýeni men konteıner poıyzy Aqtaý men Quryq porttaryna kelip jetti. Olar Ázerbaıjan, Grýzııa, Túrkııa jáne Eýropa elderine bet alady. Bul - Uly Jibek jolynyń qaıta jańǵyrýy. Kerýen attanýǵa daıyn», - dedi Quryq portynan tikeleı baılanysqa shyqqan Kólik komıtetiniń tóraǵasy Altaı Áli.
Sonymen qatar eki eldiń basshylarynan kemelerdiń júzýge ruqsat berýdi surady. Memleket basshylary ruqsat berdi.
Sondaı-aq Qasym-Jomart Toqaev pen Sı Tszınpın Qazaqstannyń Beıjiń qalasynda, Qytaı Halyq Respýblıkasynyń Astana qalasynda Mádenı ortalyqtarynyń jáne Astanada Beıjiń til jáne mádenıet ýnıversıtetteriniń ashylýyna da ruqsat berdi.
