Qazaqstan men Qytaı basshylary Qytaıdaǵy Qazaqstan týrızmi jylyna oraı quttyqtaý joldady
ASTANA. KAZINFORM - «Sınhýa» aqparat agenttiginiń habarlaýynsha, Qazaqstan Respýblıkasynyń Prezıdenti Qasym-Jomart Toqaev pen QHR Tóraǵasy Sı Tszınpın Qytaıdaǵy Qazaqstan týrızmi jylynyń ashylý saltanatyna quttyqtaý hat joldady.
Qazaqstan Prezıdenti quttyqtaý hatynda kórshiles, dostas elder retinde Qazaqstan men Qytaı ózara saıası senimdi turaqty túrde tereńdetip, túrli salalardaǵy yntymaqtastyqta zor jetistikterge qol jetkizgenin, qazirgi ýaqytta qos tarap ekijaqty qarym-qatynastardyń «jańa altyn otyz jylyn» ashý úshin birlesip jumys istep jatqanyn atap ótti.
Sondaı-aq kópjyldyq tarıhy men súıkimdi tabıǵaty, halqynyń qonaqjaılylyǵy Qazaqstandy qytaılyq saıahatshylar úshin eń jaqsy týrıstik mekenge aınaldyratynyn aıtty.
Sonymen qatar Qytaıdaǵy Qazaqstan týrızmi jyly aıasynda Qazaqstan birqatar is-shara ótkizetinin, olar qytaılyq týrısterge Qazaqstan týraly kóbirek bilýge, Qazaqstan men Qytaı arasyndaǵy máńgilik dostyqty odan ári nyǵaıtýǵa, sondaı-aq eki el arasyndaǵy jan-jaqty strategııalyq áriptestik qarym-qatynasqa jańa serpin beretine senim bildirdi.
QHR Tóraǵasy Sı Tszınpın quttyqtaý hatynda Qytaı men Qazaqstannyń tatý kórshi, berik dos, jaqsy áriptes ekenine toqtaldy. Eki el arasynda myńdaǵan jylǵa sozylǵan dostyq tarıhy bar ekenin, eki el halyqtary áıgili Jibek jolyn birlesip qalyptastyrǵanyn basa aıtty.
Sı Tszınpın 2013 jyly Qazaqstanda alǵash ret «Jibek joly ekonomıkalyq beldeýi» bastamasyn usynǵanyn eske salyp, eki eldiń «Bir beldeý - bir jol» josparynyń damýy men órkendeýine birlese yqpal etkenin atap kórsetti.
Sı Tszınpın Qazaqstannyń týrızm jyly eki halyqty bir-birine jaqyndastyrýdyń, eki el arasyndaǵy «jańa altyn otyz jyldy» bastaýdyń jáne Qazaqstan-Qytaı ortaq bolashaǵyn birlesip qurý jolynda zor úles qosýdyń mańyzdy múmkindigi bolady dep kútetinin aıtty.
Osyǵan deıin Qytaıdaǵy Qazaqstan týrızmi jylyna oraı estrada juldyzdary Beıjińde óner kórsetkenin jazdyq.
Aıta ketsek, jyldyń resmı ashylýy halyqaralyq týrızm men ınvestıtsııalarǵa arnalǵan forýmnan bastalyp, Qazaqstannyń kórmesi jáne etno-aýyldaǵy mádenı is-sharalarmen jalǵasty. Qazaqstan delegatsııasy qatarynda mınıstrlik, týrızm, bıznes, sport pen óner salasynyń ókilderi bar.
