Qazaqstan men Qytaı avtojol qurylysyna jańa dron tehnologııasyn qoldanady
ASTANA. KAZINFORM – Qazaqstan men Qytaı avtojol qurylysyna arnalǵan jańa dron tehnologııalaryn qoldaný máselesin talqylady. Bul týraly Kólik mınıstrligi habarlady.
Qazaqstan men Azııa damý bankiniń ókilderimen kólik mınıstrliginde jol ınfraqurylymyn jańǵyrtý úshin zamanaýı tehnologııalardy engizý máselelerin talqylaýǵa baǵyttalǵan semınar ótti.
Kezdesý barysynda negizgi nazar – avtojoldardy jobalaý, monıtorıng jáne qurylys protsesinde pılotsyz drondardy paıdalaný máselesi boldy. Kelissóz barysynda taraptar drondardy qoldanýdyń qurylys úderisin tıimdi ári ashyq júrgizýge múmkindik beretinin atap ótti. Aerofototúsirilim men lazerlik skanerleý tehnologııalary geodezııalyq zertteýlerdi jyldam júrgizýge, materıaldardyń sapasyn qadaǵalaýǵa, qurylys qarqynyn baqylaýǵa jáne jobalyq sheshimderden aýytqýlardy ýaqytyly anyqtaýǵa jaǵdaı jasaıdy.
Qazaqstan tarapy bul jańashyldyq jol ınfraqurylymyn tsıfrlandyrý jáne obektilerdegi qaýipsizdikti arttyrý strategııasynyń bir bóligi ekenin atap ótti. Óz kezeginde bank ókilderi iri kólik dálizderin salýda pılotsyz júıelerdi qoldaný tájirıbesimen bólisip, tehnologııalyq yntymaqtastyqty keńeıtýge daıyn ekenin rastady.
Taraptar ınnovatsııalyq sheshimdermen almasýdy jalǵastyrýǵa jáne Qazaqstannyń avtojol salasyndaǵy nysandarynda birlesken pılottyq jobalardy iske asyrý múmkindigin qarastyrýǵa ýaǵdalasty.
Kelissózder jol ınfraqurylymyn damytý, ozyq tehnologııalardy engizý, qurylys tıimdiligin arttyrý jáne seriktestikti jalǵastyrýǵa arnalǵan kelisimmen qorytyndylandy.
Aıta keteıik, pavlodarlyq oqýshy sý aıdyndarynyń sapasyn tekseretin dron qurastyrdy.