Qazaqstan men Qytaı avtotasymalǵa arnalǵan ruqsat blankilerin shekteýsiz almasýǵa kelisti
ASTANA. KAZINFORM - Beıjiń qalasynda Halyqaralyq avtomobıl tasymaldary jónindegi Qazaqstan-Qytaı birlesken komıtetiniń otyrysy ótti, dep habarlaıdy QR Kólik mınıstrliginiń baspasóz qyzmeti.
Qazaqstandyq delegatsııany Qazaqstan Respýblıkasy Kólik mınıstrliginiń Avtomobıl kóligi jáne kóliktik baqylaý komıtetiniń tóraǵasy bastap bardy.
Delegatsııa quramyna QR QM Memlekettik kirister komıteti men «QazAvtoJol» UK» AQ ókilderi de kirdi. Otyrys barysynda taraptar halyqaralyq avtomobıl tasymaldaryn damytýǵa qatysty ózekti máselelerdi talqylady. Atap aıtqanda, ruqsat berý júıesin jetildirý, shekara mańy ınfraqurylymyn damytý jáne jolaýshylar tasymaly baǵyttarynyń jelisin keńeıtý máseleleri qaraldy.
Kezdesý qorytyndysy boıynsha taraptar jyl sońyna deıin sheteldik ruqsat blankilerin sandyq shekteýsiz berý formatyna kóshýge kelisti.
Sonymen qatar, qazaqstandyq jáne qytaılyq taraptardan «Nur Joly» ótkizý pýnktiniń ótkizý qabiletin arttyrý máseleleri talqylandy. Budan bólek, bıylǵy birinshi jartyjyldyqtyń sońyna deıin WeChat Pay tólem servısi arqyly aqyly avtomobıl joldarynda jol júrý aqysyn tóleý fýnktsıonalyn engizý josparlanyp otyr. Taraptar ekijaqty yntymaqtastyqty odan ári nyǵaıtýdyń mańyzdylyǵyn atap ótip, halyqaralyq avtomobıl tasymaldary salasyndaǵy ózara is-qımyldy jalǵastyrýǵa daıyn ekenderin bildirdi.
Osyǵan deıin mAstana men Máskeý arasynda júrgizýshisiz júk kólikteri qatynaıtyny týraly jazdyq.
