Qazaqstan men Qytaı aýdıt organdary jastardy qoldaý baǵytynda birlesken bastamany iske qosty
ASTANA. KAZINFORM — Qytaıda Joǵary aýdıtorlyq palata delegatsııasynyń qatysýymen AZOSAI-dyń jastardy jetildirý baǵdarlamasy iske qosyldy. Bul týraly Joǵary aýdıtorlyq palata málim etti.
Qazaqstan Respýblıkasy Joǵary aýdıtorlyq palatasynyń tóraǵasy Álıhan Smaıylov bastaǵan delegatsııa jumys saparymen Qytaıǵa bardy. Sapar baǵdarlamasynda AZOSAI óńirlik uıymynyń jelisi boıynsha is-sharalarǵa qatysý jáne QR men QHR joǵary aýdıt organdary arasyndaǵy yntymaqtastyqty damytý kózdelgen.
Sapar aıasyndaǵy basty shara — Nankın aýdıt ýnıversıtetinde AZOSAI-dyń jastardy jetildirý baǵdarlamasyn iske qosý. Buǵan Qytaıdyń Ulttyq aýdıt keńsesi bastamashy boldy.
Baǵdarlamanyń maqsaty — Azııanyń túrli elderiniń jas aýdıtorlaryna tájirıbe almasýǵa, bilim alýǵa jáne kásibı syn-qaterlerge birlese jaýap izdeýge múmkindik berý.
Qazaqstannyń aýdıt salasyndaǵy jas mamandary da uıymnyń basqa elderinen kelgen áriptesterimen birge osy baǵdarlamaǵa qatysýda.
Saltanatty ashylý rásiminde sóz sóılegen Álıhan Smaıylov Baǵdarlamany iske qosý bolashaq aýdıtor mamandyǵyna salynyp jatqan mańyzdy ınvestıtsııa ekenin atap ótti.
Onyń aıtýynsha, jasandy ıntellektiniń damýy men tsıfrlyq valıýtalardyń tez qarqynmen taralýy jaǵdaıynda aýdıt tek ózgeristerge ilesip qana qoımaı, olardan birshama alda júrýi kerek.
— Qazir mashınalar tsıfrlardy tekserip, qujattardy salystyra alady, sáıkessizdikterdi adamnan da jyldam ári dál anyqtaı alady. Dástúrli aýdıt tolyqtaı avtomattandyrylatyn ýaqyt jaqyn. Sondyqtan joǵary aýdıt organdarynyń „baqylaýshy“ rólinen shyǵatyn kezi keldi. Týyndaıtyn problemany anyqtap qana qoımaı, oǵan jol bermeıtin aldyn alý aýdıtine kóshý qajet, — dedi Joǵary aýdıtorlyq palatanyń tóraǵasy.
Álıhan Smaıylov buǵan qosa memlekettik aýdıtorlardyń daǵdylaryn únemi jetildirip, aýdıt protsesiniń ózine tehnologııalyq ınnovatsııalar engizý qajet ekenin aıtty.
Qazaqstan da bul baǵytta kóshten qalmaı keledi. Respýblıkada aýdıtorlardy sertıfıkattaýdyń biryńǵaı júıesi qurylǵan. Joǵary aýdıtorlyq palatanyń janynan zertteý jáne oqý ortalyǵy jumys isteıdi. Azııa damý bankimen, Dúnıejúzilik bankpen, ACCA jáne CIPFA sııaqty halyqaralyq uıymdarmen tyǵyz yntymaqtastyq ornaǵan.
Tóraǵa Joǵary aýdıtorlyq palata QR-daǵy memlekettik aýdıt júıesiniń sapasy men tıimdiligin arttyrý baǵytynda júıeli jumys istep jatqanyn atap ótti. Basym baǵyttardyń qatarynda úzdik álemdik praktıka men standarttardy engizý, jappaı tsıfrlandyrý, sondaı-aq jasandy ıntellekt pen úlken derekterdi taldaýdy sııaqty ozyq IT sheshimderdi paıdalaný qamtylǵan.
— Biz túrli memlekettik organdardyń 13 aqparattyq júıesimen ıntegratsııa ornattyq jáne táýekelderdi basqarý júıesin avtomattandyrdyq. Bul bıýdjet qarajatyn tıimdi paıdalaný úshin jasalyp otyr. Sonymen qatar jasandy ıntellekt elementteri bar tsıfrlyq assıstent jumys isteıdi. Ol aýdıtorlarǵa qajetti quqyqtyq baza men qujattardy jedel tabýǵa kómektesedi, — dedi Joǵary aýdıtorlyq palatanyń tóraǵasy.
Sóz sońynda Álıhan Smaıylov jas aýdıtorlarǵa tilegin bildirip, olarǵa kásibı jolda tabys tiledi.
Buǵan deıin habarlanǵandaı, Astanada Qazaqstan men Ázerbaıjannyń joǵary aýdıt organdary basshylary kezdesti.