Qazaqstan men Qytaı arasyndaǵy júk tasymalynyń kólemi 9%-ǵa artty
ASTANA.KAZINFORM - 2026 jyldyń birinshi jartyjyldyǵynyń qorytyndysy boıynsha Qazaqstan men Qytaı arasyndaǵy júk tasymalynyń kólemi 18,7 mln tonnaǵa jetip, ótken jyldyń sáıkes kezeńimen salystyrǵanda 9%-ǵa artty. Bul týraly Kólik mınıstrligi habarlady.
Júk tasymalynyń eki baǵytynda da oń dınamıka baıqalady. Alty aıdyń qorytyndysy boıynsha Qytaıdan Qazaqstanǵa 7,0 mln tonna júk tasymaldanyp, ótken jyldyń birinshi jartyjyldyǵymen salystyrǵanda 9%-ǵa artty. Al Qazaqstannan Qytaı baǵytyna 11,7 mln tonna júk jóneltilip, bul da ótken jyldyń sáıkes kezeńindegi kórsetkishten 10%-ǵa joǵary boldy. Onyń ishinde Qytaıǵa eksporttyq tasymaldar (ken, qurama jem, qara jáne tústi metaldar, astyq, munaı jáne munaı ónimderi, sondaı-aq basqa da júkter) 8,5 mln tonnaǵa jetti. Osylaısha 2025 jyldyń sáıkes kezeńimen salystyrǵanda 20%-ǵa ósti.
Júk tasymaly kóleminiń artýyna eki eldiń temirjol ákimshilikteri arasyndaǵy júıeli ózara yntymaqtastyq yqpal etip otyr. Shekara mańyndaǵy ınfraqurylymdy damytýǵa, shekaralyq ótkelderdiń ótkizý qabiletin arttyrýǵa jáne júk tasymaly kólemin odan ári ulǵaıtýǵa qolaıly jaǵdaı jasaýǵa erekshe nazar aýdarylǵan.
Júk tasymaly kóleminiń ósýine Dostyq shekaralyq ótkeli eleýli úles qosty. Bıylǵy alty aıda atalǵan ótkel arqyly 10,6 mln tonna júk tasymaldanyp, bul 2025 jyldyń birinshi jartyjyldyǵymen salystyrǵanda 15%-ǵa artyq boldy. Sonymen qatar Dostyq stantsııasy arqyly júzege asyrylǵan eksporttyq tasymal kólemi 5,4 mln tonnaǵa jetip, ótken jyldyń sáıkes kezeńimen salystyrǵanda 15%-ǵa ósti.
1990 jyly ashylǵan Dostyq stantsııasy Qazaqstan men Qytaı arasyndaǵy júk tasymalyn uıymdastyrýdaǵy negizgi býyndardyń birine aınaldy. Ótken jyldar ishinde memlekettik shekaranyń eki jaǵynda da zamanaýı ınfraqurylym men termınaldar qalyptasty. Búginde bul – mol tájirıbeni, qalyptasqan dástúrlerdi jáne zamanaýı tehnologııalardy ushtastyrǵan iri kólik-logıstıkalyq torapqa aınaldy.
Altynkól shekaralyq ótkelinde de oń dınamıka saqtalyp otyr. Birinshi jartyjyldyqtyń qorytyndysy boıynsha atalǵan ótkel arqyly 8,1 mln tonna júk tasymaldanyp, bul ótken jyldyń sáıkes kezeńimen salystyrǵanda 2%-ǵa artyq boldy. Stantsııa arqyly ótken eksporttyq tasymal kólemi 3,1 mln tonnaǵa jetip, 2025 jyldyń birinshi jartyjyldyǵymen salystyrǵanda 29%-ǵa ósti.
Óziniń strategııalyq ornalasýynyń arqasynda Altynkól Azııa men Eýropa elderin baılanystyratyn halyqaralyq kólik dálizderiniń negizgi býyndarynyń biri bolyp sanalady. Zamanaýı qaıta tıeý qýattary, joǵary ótkizý qabileti jáne óndiristik úderistiń táýlik boıy uıymdastyrylýy memlekettik shekara arqyly júk aǵyndarynyń turaqty qozǵalysyn qamtamasyz etip, halyqaralyq júk tasymaly kólemin odan ári ulǵaıtýǵa qolaıly jaǵdaı jasap otyr.
Aıta keteıik, Gonkongtyń ulttyq áýe kompanııasy Qazaqstanǵa júk jáne jolaýshylar reısterin ashady.
