Qazaqstan men Qytaı arasyndaǵy vızasyz rejım: qujattar jyl sońyna deıin kúshine enýi múmkin
Syrtqy ister mınıstriniń orynbasary Álibek Baqaev Qazaqstan men Qytaı arasyndaǵy vızasyz rejımniń kúshine enýi talaptaryna qatysty túsinik berdi, dep habarlaıdy QazAqparat tilshisi.
Atap aıtqanda, búgin Senattyń jalpy otyrysynda «Qazaqstan Respýblıkasynyń Úkimeti men Qytaı Halyq Respýblıkasynyń Úkimeti arasyndaǵy Taraptar memleketteriniń azamattaryna qatysty aqparat almasý týraly kelisimdi ratıfıkatsııalaý týraly» Zańy maquldandy.
Senatta tilshiler Іshki ister mınıstriniń orynbasary Igor Lepehadan Qazaqstan men Qytaı arasyndaǵy vızasyz rejım qashan kúshine enetinin surady.
«Qytaı jaǵy vızasyz rejım kúshine engen jaǵdaıda, azamattardyń saparlary kúrt artatynyn bilip otyr. Sondyqtan zańsyz kóshi-qonǵa tosqaýyl qoıý maqsatynda aqparat almasý týraly kelisimdi ratıfıkatsııalaý týraly ýaǵdalastyq jasaldy. Osy qujat qabyldanǵannan keıin, osyǵan deıin bekitilgen kelisimniń kúshine enýi úshin tıisti qadamdar bastalady», - dedi I. Lepaha.
Sonymen qatar, Syrtqy ister mınıstriniń orynbasary Álibek Baqaev «QazAqparat» agenttigi tilshisine Qazaqstan men Qytaı arasyndaǵy vızasyz rejım bıyldyń aıaǵyna deıin kúshine enýi múmkin ekenin aıtty.
«Ekijaqty sharttar jasalǵan edi. Qazaqstandaǵy ratıfıkatsııa jasalǵany týraly aqparat beremiz, al Qytaı jaǵy ishki rásimderin iske asyryp jatyr. Qazaqstanǵa qatysty vızasyz rejımdi Qytaı jaǵy bıyldyń sońyna deıin bekitedi degen josparymyz bar. Jalpy, osy baǵytta eki qujatqa qol qoıylǵan jene olar ózara baılanysty. Sondyqtan búgin maquldanǵan aqparat almasýǵa qatysty zań kúshine engennen keıin, vızasyz rejım týraly qujattyń da kúshine enýine jaǵdaı jasalady. Sondyqtan jyldyń aıaǵyna deıin Qytaı jaǵy da ózindegi qujattardy qarastyryp úlgerýi yqtımal», - dedi Á. Baqaev.
Esterińizge sala keteıik, Qazaqstan Respýblıkasynyń Prezıdenti Qasym-Jomart Toqaevtyń bıyl Qytaı Halyq Respýblıkasyna memlekettik sapary aıasynda birqatar qujatqa qol qoıyldy. Olardyń arasynda «Qazaqstan Respýblıkasynyń Úkimeti men Qytaı Halyq Respýblıkasynyń Úkimeti arasyndaǵy vızalyq talaptardan ózara bosatý týraly kelisim» bar.
Osyǵan deıin Qazaqstanmen arada vızasyz rejım jóninde Qytaı jaǵynan memleketishilik rásimder áli aıaqtalmaǵany habarlanǵan edi.
«Qazaqstan men Qytaı ózara vızasyz rejım týraly kelisimniń 11-shi babyna sáıkes, osy Kelisim belgilenbegen merzimge jasalady. Ýaǵdalasýshy taraptardyń onyń kúshine enýi úshin qajet memleketshilik rásimderdi oryndaǵany týraly sońǵy habarlamany dıplomatııalyq arnalar arqyly alǵan kúnnen bastap kúntizbelik 30 kún ótken soń kúshine enedi. Óz kezeginde, Qazaqstan jaǵy memleketishilik rásimderdiń aıaqtalǵany týraly Qytaıǵa habarlama joldady. Qytaı tarapynan tıisti habarlama ázirge kelip túsken joq», - delingen Qazaqstan Syrtqy ister mınıstrliginiń «QazAqparat» agenttigine bergen jaýabynda.
