Qazaqstan men Qytaı arasyndaǵy vızasyz qatynas: jolaýshylar aǵyny 4,64 mıllıonǵa jetti
ASTANA. KAZINFORM — 10 qarasha kúni Qytaı men Qazaqstan arasyndaǵy ózara vızasyz rejımniń iske qosylǵanyna eki jyl toldy. Osy ýaqyt ishinde Shyńjań-Uıǵyr avtonomııalyq raıony aýmaǵyndaǵy shekara beketteri arqyly eki el azamattarynyń kirip-shyǵý sany 4,64 mıllıon adamǵa jetken, dep jazdy Sınhýa.
Agenttik bul týraly Qytaıdyń Ortalyq teledıdary (CCTV) ShUAR shekara qyzmetiniń derekterine silteme jasap habarlaǵan.
Shyńjań-Uıǵyr avtonomııalyq raıony Qytaıdyń soltústik-batysynda ornalasqan jáne Qazaqstanmen shektes jeti shekaralyq ótkeli bar, olardyń ishinde jolaýshylar legi boıynsha Qorǵas beketi eń irisi bolyp sanalady.
2023 jylǵy 10 qarashada eki memleket arasynda azamattardy vızalyq talaptardan ózara bosatý týraly úkimetaralyq kelisim resmı túrde kúshine endi. Statıstıkalyq málimetterge sáıkes, eki jyl ishinde Úrimji qalasyndaǵy (ShUAR ákimshilik ortalyǵy) «Tıanshan» halyqaralyq áýejaıy arqyly eki el arasyndaǵy jolaýshylar aǵyny 179 myń adamǵa jetken. Bul atalǵan kezeńde áýejaı arqyly ótken barlyq jolaýshylar sanynyń 10,3%-yna teń. Sol ýaqyt aralyǵynda Qytaıǵa vızasyz negizde kirgen qazaqstandyqtardyń sany 118 myńnan asqan.
Gýanchjoýdan kelgen ıAn Hýeıtszıa esimdi jolaýshy sapar áserimen bólisti:
– Men Gýanchjoýdan ushyp keldim, munda tranzıt jasap, ári qaraı Qazaqstanǵa baramyn. Vızasyz rejımniń arqasynda sapar aıtarlyqtaı jeńildedi. Bıyl ekinshi ret Qazaqstanǵa bara jatyrmyn, ásirese Úrimji arqyly tranzıt jasaý maǵan reıs tańdaýda kóbirek múmkindik beredi, – dedi ol.
Qazirgi ýaqytta «Tıanshan» halyqaralyq áýejaıynda Qazaqstan baǵytynda úsh turaqty halyqaralyq jolaýshylar áýe baǵyty jumys isteıdi: Úrimji–Almaty–Úrimji, Úrimji–Astana–Úrimji jáne Úrimji–Shymkent–Úrimji.
Vızasyz rejımniń yntalandyrýshy áseriniń arqasynda bıyl «Tıanshan» áýejaıynda qazaqstandyq eki jańa áýe kompanııa – SCAT Airlines jáne Fly Arystan tirkeldi. Sonymen qatar Ýrýmchı men Qazaqstan qalalary arasyndaǵy áýe qatynasy jıilep, reıster sany aptasyna shamamen 50 baǵytqa jetti, bul ótken jylmen salystyrǵanda 43%-ǵa kóp.
Resmı statıstıkaǵa sáıkes, 2025 jyldyń basynan beri Qytaı men Qazaqstan arasyndaǵy jolaýshylar aǵyny ShUAR aýmaǵyndaǵy shekara ótkelderi arqyly 2,28 mıllıon adam-reıdi qurap, ótken jylmen salystyrǵanda 25,3%-ǵa artqan.
Aıta keteıik, Qazaqstanda emdelýge tsıfrlyq vıza alý 48 elge qoljetimdi.