Qazaqstan men Qytaı arasyndaǵy temirjol arqyly júk tasymalynyń kólemi 8%-ǵa artty
ASTANA. KAZINFORM -2026 jyldyń 10 aıynyń qorytyndysy boıynsha Qazaqstan men Qytaı arasyndaǵy júk tasymalynyń kólemi 31,8 mln tonnany qurady. Bul ótken jyldyń sáıkes kezeńimen salystyrǵanda 8%-ǵa joǵary, dep habarlaıdy QR Kólik mınıstrliginiń baspasóz qyzmeti.
Byltyr osy kezeńde 29,4 mln tonna júk tasymaldanǵan. Tasymaldyń eki baǵyty boıynsha da oń dınamıka baıqalady.
Osylaısha, 2026 jylǵy qańtar–qazan aılary aralyǵynda Qytaıdan Qazaqstanǵa 12,1 mln tonna júk jetkizildi.
Onyń ishinde Dostyq shekara stantsııasy arqyly 5,0 mln tonna júk tasymaldanyp, ósim 13%-dy qurady. Al Altynkól stantsııasy arqyly tasymal kólemi 6%-ǵa artyp, 7,1 mln tonnaǵa jetti.
Keri baǵytta, ıaǵnı Qazaqstannan Qytaıǵa 19,7 mln tonna júk jóneltildi. Bul 2025 jyldyń sáıkes kezeńimen salystyrǵanda 8%-ǵa joǵary.
Shekaralyq ótkelder bólinisinde Dostyq stantsııasy arqyly 13,1 mln tonna júk tasymaldanyp, ósim 12%-dy qurady. Al Altynkól stantsııasy arqyly tasymal kólemi 1%-ǵa artyp, 6,6 mln tonnany qurady.
Júk tasymaly kóleminiń artýy Qazaqstan men Qytaı arasyndaǵy kólik-logıstıkalyq baılanystardy nyǵaıtý baǵytyndaǵy júıeli jumystardyń nátıjesinde múmkin bolyp otyr.
-Halyqaralyq temirjol qatynasyn odan ári damytý aıasynda shekara mańyndaǵy ınfraqurylymdy jańǵyrtýǵa, shekaralyq ótkelderdiń ótkizý qabiletin arttyrýǵa jáne logıstıkalyq protsesterdi jetildirýge erekshe nazar aýdarylýda. Atalǵan sharalardy iske asyrý júk aǵynynyń odan ári ulǵaıýyn qamtamasyz etýge, tasymal tıimdiligin arttyrýǵa jáne Qazaqstannyń tranzıttik-kóliktik áleýetin nyǵaıtýǵa múmkindik beredi, - delingen habarlamada.
Osyǵan deıin Qazaqstan men Tájikstannyń júk tranzıti 7 mln tonnaǵa jetkeni týraly jazdyq.