Qazaqstan men Qytaı arasyndaǵy taýar aınalymy $31,5 mlrd-qa jetti
ASTANA. KAZINFORM – Premer-Mınıstr Oljas Bektenov Qytaı Halyq Respýblıkasynyń Qazaqstan Respýblıkasyndaǵy Tótenshe jáne ókiletti elshisi Chjan Sıaomen eki memleket basshylary deńgeıinde qol jetkizilgen ýaǵdalastyqtardy iske asyrý barysyn talqylady. Bul týraly Úkimettiń baspasóz qyzmeti habarlady.
Ótken jyldyń qorytyndysy boıynsha Qazaqstan men Qytaı arasyndaǵy ekijaqty taýar aınalymy 30%-ǵa ósip, $31,5 mlrd-qa jetti. 2023 jyldyń 9 aıynda Qazaqstan ekonomıkasyna salynǵan QHR ınvestıtsııalarynyń kólemi shamamen $1,4 mlrd bolǵan.
Qazirgi ýaqytta ınvestıtsııalar kólemi $14,5 mlrd-tan asatyn 45 birlesken qazaq-qytaı jobasy iske asyrylý ústinde. Osy jyldyń 2 aıynda konteınerlik tasymaldaý kólemi 2,6 esege ósti. Sondaı-aq saýda qatynastarynyń qazirgi áleýeti taýar aınalymyn odan ári ártaraptandyrý jáne ınvestıtsııalyq ózara is-qımyldy keńeıtý perspektıvalary bar ekenin kórsetip otyr.
Kelissózder barysynda ózara saýdadaǵy shekteýlerdi joıý, ákimshilik kedergilerdi alyp tastaý jáne kedendik rásimderdi ońaılatý jónindegi sharalar qaraldy. Atap aıtqanda, elimizdiń Qytaı naryǵyna joǵary deńgeıde óńdelgen aýyl sharýashylyǵy ónimin jetkizý kólemin ulǵaıtýǵa daıyn ekeni aıtyldy.
Sondaı-aq «Baqty-Tachen» jańa temirjol arqyly ótkizý beketin salý, Transkaspıı halyqaralyq kólik baǵytynyń áleýetin keńeıtý jáne óńirlik ıntegratsııany damytý boıynsha tranzıttik-kólik salasyndaǵy iske asyrylyp jatqan qadamdar talqylandy.
Oǵan qosa jolaýshylar reısteriniń sanyn arttyrý máseleleri qaraldy.
Qazaqstan Úkimetiniń basshysy QR men QHR arasyndaǵy saýda-ekonomıkalyq áriptestik ósip kele jatqanyn atap ótti.
«Qazaq-qytaı birlesken jobalary naryqta sapaly jáne suranysqa ıe ónimder shyǵaratyn joǵary tehnologııalyq kásiporyndar qurýǵa múmkindik beredi. Búginde elimizdiń aýmaǵynda 3 000 birlesken kompanııa tabysty jumys istep jatyr. Bul eki eldiń bıznes qaýymdastyqtary seriktestiginiń turaqtylyǵy men ónimdiligin kórsetedi», — dedi Oljas Bektenov.
Óz kezeginde QHR-nyń QR-daǵy elshisi eki eldiń strategııalyq áriptestigin damytý serpini joǵary ekenin rastady.
«Búgingi tańda barlyq baǵyt boıynsha eki el arasyndaǵy qarym-qatynas jaqsy damyp keledi. Prezıdent Qasym-Jomart Toqaevtyń Qytaıǵa saparlary ekijaqty qarym-qatynasty tereńdetýge jáne damytýǵa zor serpin berdi. Biz Qazaqstan Prezıdenti jarııalaǵan aýqymdy ekonomıkalyq ózgerister baǵdarlamasyn joǵary baǵalaımyz. 2029 jylǵa qaraı Qazaqstannyń JІÓ-sin eki esege ulǵaıtý jónindegi bıik maqsatqa qol jetkizýge ábden bolady dep sanaımyz», — dedi Chjan Sıao.
Kezdesý qorytyndysy boıynsha Oljas Bektenov pen Chjan Sıao Qazaqstan men Qytaı ózara saýda-ekonomıkalyq yntymaqtastyqty dáıekti túrde damytý jumysyn kúsheıtýge daıyn ekenin rastady.
