Qazaqstan men Qytaı arasyndaǵy reıster sany aptasyna 124-ke deıin ulǵaıdy
ASTANA. KAZINFORM — Sıan qalasynda Qytaı - Ortalyq Azııa azamattyq avıatsııa salasyndaǵy yntymaqtastyq jónindegi jumys tobynyń birinshi konferentsııasy sheńberinde (S5+1) Qazaqstan Respýblıkasynyń avıatsııalyq bıligi men Qytaı Halyq Respýblıkasy arasynda kelissózder júrgizildi.
Qazaqstandyq delegatsııany Azamattyq avıatsııa komıtetiniń tóraǵasy Saltanat Tompıeva, Qytaı delegatsııasyn Qytaı azamattyq avıatsııa ákimshiligi halyqaralyq qatynastar departamenti bas dırektorynyń orynbasary Baı Venlı bastady.
«Kelissózder barysynda eki eldiń bekitilgen tasymaldaýshylarynyń ruqsat etilgen jıilikter sanyn aptasyna 124 reıske deıin ulǵaıtý jáne jıilikter boıynsha qandaı da bir shekteýsiz júk reısterin oryndaý múmkindigi jóninde ýaǵdalastyqqa qol jetkizildi», — delingen habarlamada.
Sonymen qatar tasymaldaýshylar sany artyp, Qytaı aýmaǵynda jańa pýnktter qosyldy.
Óz kezeginde qazaqstandyq avıakompanııalar Haınan aralyndaǵy (Sanıa, Haıkoý jáne Tsıýnhaı qalalary) pýnkttrge, onyń ishinde besinshi, altynshy jáne jetinshi «aýa erkindigin» paıdalana otyryp, sheksiz reısterdi oryndaý quqyǵyna ıe boldy.
«Kelissózder qorytyndysy boıynsha eki el arasynda alǵash ret „ashyq aspan“ rejımi ornatyldy, onyń sheńberinde eki eldiń taǵaıyndalǵan tasymaldaýshylary „aýa erkindiginiń“ besinshi dárejesin paıdalana otyryp, aptasyna 42 reıske deıin oryndaý quqyǵyna ıe boldy. Aıta keterligi, Qazaqstan Respýblıkasy tasymaldaýshylary „aýa erkindiginiń“ besinshi dárejesin paıdalana otyryp, Qytaıǵa reısterdi oryndaý quqyǵyna ıe bolǵan álemdegi sanaýly elderdiń biri (AQSh jáne birqatar Eýropa elderi) boldy», - dep habarlady QR Kólik mınıstrliginiń Azamattyq avıatsııa komıteti.
Qytaı Qazaqstannyń kóptegen baǵyttar boıynsha strategııalyq seriktesi, osyǵan baılanysty elder arasyndaǵy reısterdi oryndaý úshin quqyqtyq bazany keńeıtý yntymaqtastyqty odan ári damytý úshin mańyzdy qadam bolyp tabylady.
