Qazaqstan men Qytaı arasyndaǵy medıa yntymaqtastyq turaqty ári uzaqmerzimdi sıpatqa ıe — Evgenıı Kochetov
ASTANA. KAZINFORM — Mádenıet jáne aqparat vıtse-mınıstri Evgenıı Kochetov Qazaqstan men Qytaıdyń birlesken medıa jobalar týraly aıtyp berdi.
— Turaqty kezdesýler men birlesken medıa jobalar, ózara seriktestikti saqtap qana qoımaı, qarqyndy damyp, jańa deńgeıge kóterilip kele jatqanynyń naqty dáleli. Bul elderi arasyndaǵy senimdi nyǵaıtyp qana qoımaı, sonymen qatar óńirimizdiń jáne onyń sheginen tys jerlerdegi ortaq bastamalardy júzege asyrý úshin keń múmkindikter ashady. Osy úderiste medıa platformanyń róli asa mańyzdy. Yntymaqtastyqty nyǵaıtýdyń jarqyn mysaly, jýyrda Qytaıda ótken sharaǵa qazaqstandyq medıa salasynyń ókilderi qatysqan oqıǵa. Bıyl Qazaqstan delegatsııasy Qytaıdyń Tsıýıfý qalasynda ótken China Media Group (CMG) uıymdastyrǵan 4-shi jahandyq medıa ınnovatsııalar forýmyna qatysty. Qazaqstan men Qytaı arasyndaǵy medıa yntymaqtastyq turaqty ári uzaqmerzimdi sıpatqa ıe, kezeń-kezeńimen damyp kele jatqanyn kórsetedi. Osy oraıda, biz tek aqparat almasýmen shektelmeı, tolyqqandy kommýnıkatsııalyq ortanyń qalyptasyp jatqanyn baıqap otyrmyz, — dedi Evgenıı Kochetov elordada ótip jatqan «Ortalyq Azııa — Qytaı» medıaforýmynda.
Vıtse-mınıstr sońǵy jyldardaǵy mańyzdy jetistikterdiń biri retinde Horgos shekara mańy halyqaralyq yntymaqtastyq ortalyǵy bazasynda birlesken baspasóz ortalyǵynyń iske qosylýyn atady.
— Memleket basshylarynyń qos el astanasynda mádenı ortalyqtar qurý týraly bastamasy elderimiz arasyndaǵy mádenı baılanysqa jańa serpin berdi. Bul ortalyqtar ulttyq mádenıetti ilgeriletýdiń jáne gýmanıtarlyq yntymaqtastyqty nyǵaıtýdyń kópfýnktsıonaldy quralyna aınalady. Sońǵy trendti eskere otyryp, búginde medıa men kreatıvti ındýstrııalar qarqyndy transformatsııa kezeńin bastan keshýde. Tsıfrlandyrý, platformalyq ekonomıkanyń damýy, jasandy ıntellektti engizý jáne qoldanýshylyq kontenttiń ósýi medıanyń tabıǵatyn, ony tutyný formalaryn jáne kásibı qaýymdastyqqa qoıylatyn talaptardy túbegeıli ózgertýde, — deıdi ol.
Onyń aıtýynsha, Qazaqstan men Qytaı ulttyq mádenıetti zamanaýı medıa platformalar arqyly ilgeriletýge baǵyttalǵan jobalardy tabysty júzege asyryp keledi.
— Búgingi forým bizdiń yntymaqtastyǵymyzdy tereńdetip, osy salada tájirıbe almasýǵa qosymsha alań bolady dep senemin. Kelesi qadam — sapaly kontent jasaýǵa basymdyq bere otyryp, birlesken medıa ónimderdi belsendi damytý. Qazir bizde birqatar sátti premera, birlesken translıatsııa men tok-shoýlar bar. «Habar» arnasy qytaılyq áriptesterimen birge taqyryptyq derekti fılm túsirip jatyr. BAQ jáne mádenı baǵdarlamalar salasyndaǵy birlesken jobalardy odan ári iske asyrý, biryńǵaı aqparattyq keńistikti qalyptastyrýǵa jáne ózara baılanystarymyzdy nyǵaıtýǵa yqpal etedi, — dep qorytyndylady Evgenıı Kochetov.
Búgin Astanada «Ortalyq Azııa — Qytaı» medıaforýmy ótip jatyr.