Qazaqstan men Qytaı arasyndaǵy ınvestıtsııalyq yntymaqtastyq keńeıtiledi - Senat
ASTANA. KAZINFORM – Búgin Senattyń jalpy otyrysynda «Qazaqstan Úkimeti men Qytaı Úkimeti arasyndaǵy ınvestıtsııalardy kótermeleý jáne ózara qorǵaý týraly kelisimdi ratıfıkatsııalaý týraly» Zań maquldandy.
Kelisimge 2025 jylǵy 16 maýsymda Astana qalasynda QHR Tóraǵasy Sı Tszınpınniń memlekettik sapary barysynda qol qoıyldy. Qujat ınvestıtsııalyq yntymaqtastyqtyń quqyqtyq bazasyn jańǵyrtýǵa jáne birlesken jobalardy iske asyrý úshin qolaıly ekojúıeni qalyptastyrýǵa baǵyttalǵan. Kelisimniń erejeleri uzaq merzimdi ekonomıkalyq ózara is-qımyl úshin qajetti turaqtylyq pen quqyqtyq aıqyndyqty qamtamasyz ete otyryp, ınvestorlardyń quqyqtaryn qorǵaýdyń qazirgi zamanǵy halyqaralyq standarttaryn bekitedi.
- Kelisimde kózdelgen kepildikter júıesi ózara qarym-qatynas pen ulttyq múddelerdi qorǵaý qaǵıdattaryna negizdelgen. «Ulttyq rejım» jáne «barynsha qolaılylyq rejımi» tetikteri ınvestorlarǵa kemsitýshilikti boldyrmaıtyn jáne teń básekelestik ortany qamtamasyz etetin jaǵdaılarǵa kepildik beredi. Kapıtal salymdaryn qorǵaýǵa erekshe nazar aýdarylady: Kelisim menshikti qorǵaý tártibin naqty reglamentteıdi jáne aktıvter qoǵamdyq múddeler úshin zańdy túrde alynǵan jaǵdaıda mólsherles ótemaqy tólemine kepildik beredi. Sondaı-aq ulttyq bankter aktıvteriniń mártebesi bekitiledi jáne halyqaralyq tórelik ınstıtýttarǵa júginý arqyly daýlardy sheshýdiń ashyq tetigi belgilenedi, - dep atap ótilgen Senattyń Halyqaralyq qatynastar, qorǵanys jáne qaýipsizdik komıtetiniń málimetinde.
Kelisimdi ratıfıkatsııalaý ekonomıkanyń naqty sektorynyń áleýetin arttyrý jáne aýqymdy ınfraqurylymdyq bastamalardy iske asyrý úshin mańyzdy mánge ıe.
- Qytaı Halyq Respýblıkasy – Qazaqstannyń iri saýda-ekonomıkalyq seriktesteriniń biri. Eki el arasyndaǵy yntymaqtastyq sońǵy jyldary jańa deńgeıge kóterilip keledi. Búginde kólik-logıstıka, ónerkásip, energetıka, aýyl sharýashylyǵy, tsıfrlandyrý jáne ınfraqurylym salalarynda birlesken jobalar júzege asyrylyp jatyr. Usynylyp otyrǵan Kelisim osy yntymaqtastyqty quqyqtyq turǵydan odan ári kúsheıtýge baǵyttalǵan. Atap aıtqanda, qujatta ınvestorlardyń quqyqtary men zańdy múddelerin qorǵaýdyń naqty kepildikteri qarastyrylǵan. Investıtsııalarǵa ádil jáne teń quqyqtyq rejım usynylady. Investorlardyń múlki zańsyz eksproprıatsııadan qorǵalady. Investıtsııalyq qyzmetten túsetin tabystar men qarajattardy erkin aýdarýǵa múmkindik beriledi, - dedi senator Amangeldi Nuǵmanov.
Buǵan deıin Májilis Qazaqstan men Qytaı arasyndaǵy ınvestıtsııalardy qorǵaý týraly zań qabyldaǵanyn jazǵan edik.
