Qazaqstan men Qytaı arasyndaǵy áýe reısteri aptasyna 152-ge deıin kóbeıedi
ASTANA. KAZINFORM – Qazaqstan men Qytaı arasyndaǵy turaqty jolaýshylar reısteriniń sany aptasyna 124-ten 152-ge deıin ulǵaıady. QR Kólik mınıstrligi Azamattyq avıatsııa komıtetiniń tóraǵasy Saltanat Tompıeva men Qytaıdyń Azamattyq avıatsııa basqarmasy (CAAC) bas dırektorynyń orynbasary Baı Venlı osyndaı kelisimge qol qoıdy.
Kezdesý barysynda taraptar eki el arasyndaǵy azamattyq avıatsııa salasyndaǵy yntymaqtastyqty keńeıtý máselelerin talqylady. Nátıjesinde turaqty jolaýshylar reısteriniń sanyn kóbeıtý jóninde kelisimge qol jetkizildi.
– Taraptar eki eldiń áýe tasymaldaýshylary úshin turaqty jolaýshylar reısteriniń sanyn aptasyna 124-ten 152-ge deıin arttyrýǵa kelisti. Sonymen qatar Qazaqstanmen áýe qatynasyn júzege asyratyn Qytaı qalalarynyń tizimi 11-ge deıin keńeıtilip, oǵan eldiń iri kólik-logıstıkalyq jáne ónerkásiptik ortalyqtarynyń biri – Chýntsın qalasy engizildi, – delingen mınıstrlik habarlamasynda.
Kelissózder barysynda Astana men Shanhaı arasynda, onyń ishinde qytaılyq áýe kompanııalary oryndaıtyn tikeleı reısterdi ashý máselesi de qaraldy. Sondaı-aq Qazaqstan men Qytaı arasynda úshinshi halyqaralyq áýe dálizin qurý bastamasy talqylandy.
Mınıstrliktiń málimetinshe, bul sheshimder áýe keńistiginiń ótkizý qabiletin arttyryp, ushý baǵyttaryn ońtaılandyrýǵa, qoldanystaǵy áýe dálizderine túsetin júktemeni azaıtýǵa jáne eki el arasyndaǵy áýe qatynasyn odan ári damytýǵa múmkindik beredi.
– Kezdesý barysynda qazaqstandyq áýe kompanııalaryna Qytaı áýejaılarynan slottar bólý, Qytaıdyń áýe keńistigin paıdalaný, sondaı-aq azamattyq áýe kemelerin avıatsııalyq izdestirý jáne qutqarý salasyndaǵy vedomstvoaralyq yntymaqtastyq týraly kelisim jasasý máseleleri de qaraldy, – dep atap ótti vedomstvo.
Taraptar azamattyq avıatsııa salasyndaǵy yntymaqtastyqty odan ári damytýǵa ózara múddeliligin rastap, áýe qatynasyn keńeıtý jáne kólik baılanysyn nyǵaıtý baǵytyndaǵy birlesken jumysty jalǵastyrýǵa ýaǵdalasty.
Aıta keteıik, Qazaqstannan Grýzııaǵa jańa áýe reısi iske qosylady.
