Qazaqstan men Qytaı arasynda júk tasymaldaý kólemi rekordtyq kórsetkishke jetti

ASTANA. KAZINFORM – Qytaı Halyq Respýblıkasynda Kólik mınıstrligi, bıznes-kompanııalar jáne basqa da memlekettik organdar ókilderiniń qatysýymen alǵashqy Qazaqstan-Qytaı astyq forýmy ótti. Taraptar QR men QHR arasyndaǵy taýar aınalymynyń múmkindikteri, sondaı-aq eksporttyq júkterdi jetkizý sharttaryn talqylady, dep habarlaıdy vedomstvonyń baspasóz qyzmeti.

Ortalyq kommýnıkatsııalar qyzmetiniń jazýynsha, eki el arasyndaǵy júk tasymaldaý kólemi 2022 jylmen salystyrǵanda 22%-ǵa ósip, rekordtyq kórsetkishke, ıaǵnı 28 mln tonnaǵa jetti. Osy rette Qazaqstannan eksportqa 12,6 mln tonna jóneltildi, bul 2022 jylǵy deńgeıden 35%-ǵa artyq.

Sonymen qatar qazaqstandyq delegatsııa Alashankoý stantsııasynyń bond aımaǵyndaǵy dándi daqyldar men ósimdik maılaryn tasymaldaý boıynsha jańa termınaldyń jumysymen tanysty. Kezdesý barysynda taraptar tasymaldaý tehnologııasy jáne qazaqstandyq agroónimdi qabyldaýdy ulǵaıtý týraly kelisti.

Taraptar sondaı-aq QHR-ǵa eksportty tasymaldaý kezinde týyndaıtyn máselelerdi anyqtaý jáne sheshý úshin jumys tobyn qurýǵa kelisti.

«Búgingi tańda Qazaqstannan Qytaıǵa jetkiziletin negizgi daqyldardyń qatarynda arpa men bıdaı bar. Eki taraptyń birlesken jumysynyń nátıjesinde 2023 jyly pandemııadan keıin QHR-ǵa tasymaldaýdy qaıta bastaýǵa múmkindik týdy. Bul dándi daqyldar eksportyn 2,5 esege arttyrýǵa múmkindik berdi. Máselen, 2021 jyly shamamen 347 myń tonna, 2022 jyly 747 myń tonna, al 2023 jyly 2 227 myń tonna eksporttaldy» - dep atap ótti Temirjol jáne sý kóligi komıteti tóraǵasynyń orynbasary Nurjan Kelbuǵanov.

Buǵan deıin Qytaıdyń tuńǵysh iri krýız laıneri bortyna 150 myń týrıst qabyldaǵanyn jazǵan bolatynbyz.