Qazaqstan men Qytaı arasynda jańa áýe baǵyttary ashylýy múmkin
ASTANA. KAZINFORM – Qazaqstan men Qytaı arasynda jańa óńirlik áýe baǵyttaryn ashý jáne birlesken áýe kompanııasyn qurý máselesi talqylandy.
Qazaqstan Respýblıkasy Kólik vıtse-mınıstri Talǵat Lastaev pen «Urumqi Airlines» áýe kompanııasynyń vıtse-prezıdenti Chjan Lıannyń kezdesýinde qytaılyq tarap Úrimshi – Qaraǵandy, Qulja (Inın) – Astana jáne Qulja (Inın) – Almaty baǵyttary boıynsha turaqty reıster ashý josparyn tanystyrdy.
Óz kezeginde qazaqstandyq tarap áýe kompanııasyna Óskemen men Semeı qalalaryna, sondaı-aq bolashaqta Zaısan jáne Katonqaraǵaıdaǵy jańa óńirlik áýejaılarǵa reıster ashý múmkindigin qarastyrýdy usyndy. Mınıstrliktiń málimetinshe, bul bastama týrızmdi damytýǵa, kólik qoljetimdiligin arttyrýǵa jáne Qazaqstan men Qytaı arasyndaǵy saýda-ekonomıkalyq baılanysty nyǵaıtýǵa yqpal etedi.
– Taraptar Qazaqstanda COMAC áýe kemelerin paıdalana otyryp, óńirlik tasymaldardy júzege asyratyn birlesken óńirlik áýe kompanııasyn qurý jónindegi jobany iske asyrý múmkindigin talqylady. Mundaı áýe kompanııasy Zaısan, Katonqaraǵaı jáne týrıstik áleýeti joǵary ózge de qalalarǵa reıster oryndaýǵa múmkindik beredi, – delingen mınıstrlik habarlamasynda.
«Urumqi Airlines» Qytaıda óndirilgen COMAC C909 ushaqtaryn paıdalanady. Osyǵan baılanysty kezdesýde óńirlik áýe tasymaldaryn damytý jáne jańa baǵyttardy iske qosý máselelerine erekshe nazar aýdaryldy.
Kezdesý qorytyndysynda taraptar azamattyq avıatsııa salasyndaǵy yntymaqtastyqty odan ári damytýǵa jáne birlesken jobalardy júzege asyrýǵa ózara múddeli ekenin rastady.
Aıta keteıik, túrkııalyq áýe kompanııa Qazaqstanǵa tikeleı reıster ashady.
