Qazaqstan men Qytaı arasynda veterınarııalyq talaptar týraly hattamaǵa qol qoıyldy
ASTANA. KAZINFORM – Astanada Qytaı Halyq Respýblıkasynyń Tóraǵasy Sı Tszınpınniń Qazaqstanǵa memlekettik sapary aıasynda memleketaralyq, vedomstvoaralyq jáne kommertsııalyq qujattarǵa qol qoıyldy.
Búgin qol qoıylǵan mańyzdy qujattardyń qatarynda qazaqstandyq fermerler kóp kútken Qazaqstan Respýblıkasy Aýyl sharýashylyǵy mınıstrligi men Qytaı Halyq Respýblıkasynyń Bas keden basqarmasy arasyndaǵy Qazaqstan Respýblıkasynan Qytaı Halyq Respýblıkasyna soıýǵa eksporttalatyn tiri iri qara malǵa qoıylatyn veterınarııalyq talaptar men janýarlardyń densaýlyǵyn qorǵaý týraly hattamany atap ótýge bolady.
Bul oqıǵa Qazaqstan men Qytaı arasyndaǵy ekonomıkalyq baılanystardy nyǵaıtýdaǵy mańyzdy qadam bolyp sanalady jáne aýyl sharýashylyǵy salasyndaǵy yntymaqtastyqty nyǵaıtýǵa, eldiń eksporttyq áleýeti men qazaqstandyq ónimniń halyqaralyq naryqtaǵy básekege qabilettiligin arttyrýǵa yqpal etedi.
QR Aýyl sharýashylyǵy mınıstrligi qazaqstandyq agrobıznes úshin eksporttyq múmkindikterdi keńeıtý boıynsha belsendi jumys atqarýda. Qytaıǵa eksportqa erekshe nazar aýdarylady, onyń tarapynan AÓK ónimderine joǵary suranys baıqalady.
Atap aıtqanda, 2024 jyldyń aqpan aıynda QHR 2 jyldan astam ýaqytqa sozylǵan aýsyl men qus tumaýyna baılanysty ýaqytsha shekteýlerdi alyp tastady. Maýsym aıynda QHR-ǵa alǵashqy 20 tonna sıyr etin «Meat Processing and Service» JShS eksporttady.
Qazaqstannan Qytaıǵa soıýǵa eksporttalatyn tiri ІQM veterınarııalyq talaptaryn kelisý boıynsha jumys 2 jyl boıy júrgizildi. Nátıjesinde búgin hattamaǵa qol qoıyldy.
Sondaı-aq Qytaıǵa qus ónimderi, iri qara mal terisi men ishki ónimder eksportyn ashý jumystary júrgizilýde.
Esterińizge sala keteıik, Qazaqstan men QHR arasynda tońazytylǵan sıyr eti, tońazytylǵan qoı eti, tońazytylǵan shoshqa eti, bal, balyq, sút ónimderi, jún shıkizaty jáne t.b. aýyl sharýashylyǵy ónimderiniń 9 túrin eksporttaýǵa Hattamalarǵa qol qoıylǵan bolatyn.
Aıta keteıik, 2023 jyly jalpy taýar aınalymy 1,7 esege (1,3 mlrd AQSh dollaryna deıin) ulǵaıǵan kezde qazaqstandyq AÓK óniminiń Qytaıǵa eksporty 1,01 mlrd AQSh dollaryn qurady, bul ótken jylmen salystyrǵanda 2 esege kóp (2022 j. - 550 mln dollar). Aǵymdaǵy jyldyń 5 aıynda taýar aınalymy ótken jyldyń osy kezeńimen salystyrǵanda 14% -ǵa artyp, 540 mln AQSh dollaryn qurady.
