Qazaqstan men Qytaı arasynda Tsındaoda $125 mln kelisimge qol qoıyldy
ASTANA. KAZINFORM – Tsındaoda ótken saýda-ekonomıkalyq mıssııanyń qorytyndysy boıynsha qazaqstandyq kompanııalar qytaılyq seriktestermen jalpy somasy $125 mln bolatyn kelisimderge keldi. Bul týraly Saýda jáne ıntegratsııa mınıstrliginiń baspasóz qyzmeti habaralady.
Shandýn – Qytaıdaǵy iri ekonomıkalyq óńirlerdiń biri. Munda qýatty óndiris bazasy men úlken tutyný naryǵy bar. QazTrade málimetinshe, 2025 jyldyń qorytyndysy boıynsha Qazaqstan men Shandýn arasyndaǵy taýar aınalymy $2,2 mlrd-qa jetip, 40 paıyzdan astam ósti.
Mıssııaǵa 25-ten astam otandyq kompanııa qatysty. Sapardyń negizgi bóligi qytaılyq ımporttaýshylar men dıstrıbıýtorlarmen tikeleı B2B kezdesýlerge baǵyttaldy.
Qazaqstan Qytaı tarapyna agroónerkásip pen tereń óńdelgen ónimder usyndy. Un, maı ónimderi, bal, sút jáne kondıterlik taýarlar qytaılyq bıznes tarapynan joǵary qyzyǵýshylyq týdyrdy.
Sapar aıasynda Saýda jáne ıntegratsııa mınıstri Arman Shaqqalıev Shandýn provıntsııasynyń basshylyǵy jáne bıznes ókilderimen kelissóz ótkizdi. Negizgi nazarda jetkizilim kólemin arttyrý jáne kelissózderdi naqty nátıjege aınaldyrý. Sondaı-aq ındýstrııalyq kooperatsııa máselesi de talqylandy. Sapar aıasynda mınıstr álemdik iri turmystyq tehnıka óndirýshileriniń biri Haier kompanııasynyń óndiristik alańyna bardy.
Saýda-ekonomıkalyq mıssııasy Saýda jáne ıntegratsııa mınıstrligi men QazTrade uıymdastyrýymen ótti.
