Qazaqstan men Qytaı arasynda áýe reısteri kóbeıip jatyr
Azamattyq avıatsııa komıteti Prezıdenttiń eldiń tranzıttik áleýetin arttyrý jónindegi tapsyrmasyn oryndaý maqsatynda, sondaı-aq qoldanystaǵy halyqaralyq baǵytta reıs sanyn arttyrý boıynsha turaqty negizde jumys júrgizip keledi, dep habarlaıdy Kazinform.
Osylaısha Azamattyq avıatsııa komıteti tóraǵasynyń mindetin atqarýshy Tımýr Tlegenov Qazaqstan Respýblıkasyna turaqty Air China, China Southern Airlines jáne Loong Airlines qytaılyq áýe kompanııalarynyń ókilderimen kezdesti.
Kezdesý barysynda China Southern Airlines áýekompanııasy 2024 jylǵy 23 qańtardan bastap aptasyna 3 reıs jıiligimen Almaty – Beıjiń baǵyty boıynsha reıster ashýdy josparlap otyrǵanyn habarlady.
Sonymen qatar suranys artqan kezde China Southern Airlines áýekompanııasy Almaty qalasynan Úrimshi jáne Sıan qalalaryna, sondaı-aq Astana qalasynan Úrimshi qalasyna 2024 jyldyń kóktem-jaz maýsymynan bastap qoldanystaǵy baǵyttar boıynsha reıs sanyn ulǵaıtý múmkindigin qarastyrýǵa daıyn.
Óz kezeginde Loong Airlines áýekompanııasy bıyl jeltoqsan aıynda Almaty – Hanchjoý baǵyty boıynsha oryndalatyn reıster sanyn aptasyna 3 reısten 4 reıske deıin arttyrýdy josparlap otyr.
Kelesi jyly jolaýshylar aǵyny artqan jaǵdaıda áýe kompanııasy reıster sanyn aptasyna 7-ge deıin arttyrýdy kózdep otyr.
Sondaı-aq áýekompanııa 2024 jyly Astana – Hanchjoý, Astana – Chendý jáne Almaty-Chendý áýe baǵyttary boıynsha reısterdi ashý máselesin pysyqtap jatyr.
Air China áýekompanııasy da Astana – Sıan – Pekın baǵyty boıynsha oryndalatyn reıster sanyn aptasyna 2-den 3-ke deıin ulǵaıtý máselesin qarastyryp jatqanyn habarlady.
Bul rette áýekompanııa Sıan qalasyna qonbaı, eki astana arasynda aptasyna úshinshi reısti tikeleı oryndaý máselesin de qarastyratyn bolady.
Jalpy 2024 jylǵy kóktem-jaz navıgatsııa kezeńinde eki el arasyndaǵy reıster sany qoldanystaǵy jáne jańa áýe baǵyttary boıynsha aptasyna 30 reıske deıin artady.
