Qazaqstan men Qytaı arasynda 75 mln AQSh dollaryna et eksporty boıynsha kelisimge qol qoıyldy
ASTANA. KAZINFORM – AShM alańynda 75 mln AQSh dollaryna et eksporty boıynsha kelisimderge qol qoıyldy. Bul týraly vedomstvonyń baspasóz qyzmeti málim etti.
Aýyl sharýashylyǵy mınıstrligi Memleket basshysynyń eksportty ulǵaıtý jónindegi tapsyrmasy jáne QHR men QR arasynda qol qoıylǵan veterınarlyq talaptar jónindegi hattama sheńberinde jumysyn jalǵastyryp otyr. Osyǵan baılanysty búgin vedomstvoda Aýyl sharýashylyǵy mınıstri Aıdarbek Saparov qytaılyq CITIC Construction jáne Beijing Capital Agro kompanııalarynyń basshylyǵymen kezdesti.
Mınıstr aýyl sharýashylyǵy salasyndaǵy Qazaqstan-Qytaı seriktestiginiń mańyzdylyǵyn atap ótti. Qytaı aýyl sharýashylyǵy salasyndaǵy bizdiń iri saýda seriktesterimizdiń úshtigine kiredi. 2023 jyly QR men QHR arasyndaǵy AÓK ónimderiniń taýar aınalymy 1,3 mlrd AQSh dollaryn qurady, bul 2022 jylmen salystyrǵanda 67%-ǵa artyq. QHR-ǵa aýyl sharýashylyǵy ónimderin eksporttaý kólemi 2 esege ósip, 1 mlrd AQSh dollaryna jetti.
«Qytaıǵa eksporttyń negizgi kólemi dándi jáne maıly daqyldarǵa, túrli maılarǵa tıesili, biraq biz mal sharýashylyǵy ónimderi esebinen eksport kólemin ulǵaıtý úshin úlken áleýetti kórip otyrmyz», - dep atap ótti mınıstr.
Aıdarbek Saparov Qazaqstanda eksporttyq áleýetti tıimdi paıdalaný jáne damytý, ekologııalyq taza ónim óndirý, jem-shóp óndirisi úshin barlyq jaǵdaı jasalǵanyn atap ótti.
Bıyl Prezıdenttiń tapsyrmasy boıynsha egis alqaptaryn ártaraptandyrý jumystary kúsheıtildi, jemshóp daqyldarynyń alqaby 314 myń gektarǵa ulǵaıtyldy. Bul úrdis mal sharýashylyǵynyń barlyq túrleriniń, onyń ishinde qus sharýashylyǵynyń, sútti jáne etti mal sharýashylyǵynyń damýyna yqpal etedi.
2024 jyldyń aqpanynda QHR Úkimeti Qazaqstannyń ońtústik-shyǵys óńirlerinen et ónimderin eksporttaý boıynsha shekteýlerdi alyp tastady. Bul joǵary sapaly azyq-túlik ónimderiniń eksportyn jańǵyrtýǵa múmkindik berdi – sıyr etiniń birinshi partııasy maýsym aıynda QHR-ǵa eksporttaldy. Búgin 75 mln AQSh dollary somasyna úsh jańa shartqa qol qoıylady.
«QHR Tóraǵasy Sı Tszınpınniń Qazaqstanǵa memlekettik sapary aıasynda bizdiń mınıstrlik pen QHR GTQ arasynda iri qara maldy eksporttaýǵa arnalǵan veterınarlyq talaptardy kelisý jónindegi Hattamaǵa qol qoıyldy. Eksporttalatyn ónim nomenklatýrasyn ulǵaıtý boıynsha jumys júrgizilýde. AÓK ónimderiniń taǵy 10 túri ázirlenýde. Biz AÓK salasyndaǵy birlesken ınvestıtsııalyq jobalardy júzege asyrýǵa jáne yntymaqtastyqqa ashyqpyz. Onyń ústine bul baǵytta oń tájirıbe bar: maıly daqyldardy qaıta óńdeý, qurǵaq sút óndiretin kásiporyndar jumys isteıdi, bıdaıdy, júgerini tereń qaıta óńdeý zaýyttaryn, mal sharýashylyǵy keshenin salý josparlanǵan», – dedi mınıstr.
Óz kezeginde qytaılyq kompanııalardyń ókilderi Qazaqstanmen sıyr eti men tiri mal satyp alý turǵysynan uzaq merzimdi yntymaqtastyqqa qyzyǵýshylyq tanytty.
Beijing Capital Agro kompanııasy 2030 jylǵa deıin etti mal sharýashylyǵy salasyna 600 mln dollardan astam ınvestıtsııa salýǵa nıetti. Joba aıasynda bordaqylaý alańdary qurylady, 600-den astam fermerlik sharýashylyq pen jumys istep turǵan bordaqylaý alańdary iskerlik áriptestikke tartylady.
3500-den astam jumys orny qurylady dep kútilýde.
Kezdesý qorytyndysy boıynsha «Meat processing and Servis company», Agro Silk Way, «Astana Agro Prodýkt» JShS QHR kompanııalarymen et eksportyna, sondaı-aq tiri mal jetkizýge úsh kelisimshartqa qol qoıdy.
