Qazaqstan men Qytaı agroónim saýdasyna arnalǵan birlesken tsıfrlyq platformany iske qospaq
ASTANA.KAZINFORM – Astanada «Azyq-túlik kelisimshart korporatsııasy» Ulttyq kompanııasy» AQ ókilderi men China National Grain Trade Center delegatsııasynyń kezdesýi ótip, onda agroónimder saýdasyna arnalǵan birlesken tsıfrlyq platformany iske qosý, sondaı-aq yntymaqtastyqtyń basym baǵyttaryn tereńdetý máseleleri talqylandy.
Kezdesýde ásirese, Qytaı tarapynyń qoldanystaǵy ulttyq elektrondyq saýda platformasy bazasynda qazaqstandyq jetkizýshilerge arnalǵan arnaıy bólim qurý jónindegi usynysqa aıryqsha kóńil bólindi. Josparǵa sáıkes, bul bólimdi Qazaqstannan astyq, maıly daqyldar (kúnbaǵys pen rapsty qosa alǵanda), ósimdik maıy, sondaı-aq bolashaqta soıa sııaqty ózge de suranysqa ıe ónimderdi satyp alýǵa baǵyttaý josparlanǵan.
Qoldanystaǵy qytaılyq alań bazasynda tsıfrlyq arna qurý otandyq óndirýshilerdiń Qytaı naryǵyna qol jetkizý tetikterin jeńildetýge múmkindik beredi.
AQK ókilderiniń aıtýynsha, bul – mámilelerdiń ashyqtyǵyna, qaýipsizdigine jáne ónim sapasyna basa nazar aýdarylatyn saýdanyń jańa formaty.
Mámile sharttarynyń oryndalýyn qamtamasyz etý úshin qytaılyq alańdaǵydaı kepildik jarna qoldaný kózdelip otyr.
Qarjylyq esep aıyrysýlar taraptar arasynda onlaın-formatta, platformanyń múmkindikteri arqyly júrgiziledi.
Yntymaqtastyqtyń mańyzdy bólikteriniń biri jetkiziletin ónimniń sapasyn baqylaý. Qytaı Ulttyq astyq saýda ortalyǵy bólim basshysynyń orynbasary Chjao Tszelınniń aıtýynsha, negizgi talap satyp alý kezinde – satyp alýshynyń sharttary, al satý kezinde – satýshynyń derekteri bolyp sanalady. Daýly másele týyndaǵan jaǵdaıda túpkilikti sheshimdi eki elde de tirkelgen táýelsiz ınspektsııalyq uıym qabyldaıdy. Sondaı-aq daýlardy retteý júıesi de kózdelgen.
Alǵashqy kezeńde qatysýshylar kedendik rásimdeýdi ózderi júzege asyrmaq. Keıinnen Qazaqstan men Qytaıdyń salalyq qyzmetterimen ózara is-qımyldy jolǵa qoıý arqyly kedendik rásimderdi jeńildetý jáne jedeldetý josparlanyp otyr.
Sonymen qatar, taraptar saýdaǵa qatysýshylarǵa qoldaý quraldaryn, onyń ishinde agroónim jetkizýshilerin nesıeleý jáne qarjylandyrý múmkindikterin qarastyrýda.
Atalǵan korporatsııanyń Beıjińdegi ókili Aıjan Jamalovanyń aıtýynsha, qytaı naryǵyna júrgizilgen taldaý jáne seriktester áleýetin baǵalaý eki eldiń agroónim jetkizýshileri men satyp alýshylary úshin astyq platformasyna qatysý ózara tıimdi múmkindikter ashatynyn kórsetti.
Bul alań QHR-dyń shamamen 50 myń aýyl sharýashylyǵy kásipornyn biriktiredi jáne 20 jyldan astam ýaqyt boıy onlaın-saýda formatynda tabysty jumys istep keledi. Qazaqstan úshin bul otandyq agroónimder eksportyn keńeıtýdiń jańa quraly bola alady.
Aıta ketelik elde 20 mln tonnaǵa jýyq astyq bastyrylǵan edi.