Qazaqstan men Qytaı agrarlyq saladaǵy yntymaqtastyqtyń jańa baǵyttaryn aıqyndady
ASTANA. KAZINFORM — Qazaqstan 8-shi Qytaı astyq saýdasy konferentsııasyna qatysýda. Qazaqstandyq delegatsııany aýyl sharýashylyǵy vıtse-mınıstri Nazgúl Hatepova bastap bardy.
Jumys sapary aıasynda vıtse-mınıstr Qytaı Halyq Respýblıkasynyń Azyq-túlik jáne materıaldyq rezervter jónindegi memlekettik basqarmasynyń (NAFRA) basshysy Lıý Hýansınmen kezdesti.
Taraptar saýda-ekonomıkalyq baılanystardyń qazirgi jaı-kúıin, ózara saýda kólemin arttyrý múmkindikterin, sondaı-aq aýyl sharýashylyǵy ónimderin jetkizýdi ulǵaıtý sharalaryn talqylady.
— Qytaı — Qazaqstannyń agroónerkásiptik keshen salasyndaǵy negizgi strategııalyq seriktesteriniń biri. Geografııalyq jaqyndyq, ekonomıkalarymyzdyń ózara úndestigi jáne azyq-túlikke degen suranystyń artýy tıimdi yqppldastyqty odan ári keńeıtýge berik negiz qalyptastyrady. Biz ónimderimizge suranysty kúsheıtýge jáne olardy Qytaı naryǵyna shyǵarýdyń jańa joldaryn qalyptastyrýǵa múmkindik beretin júıeli áriptestikti damytýǵa múddelimiz, — dedi Nazgúl Hatepova.
Ótken jyldyń qorytyndysy boıynsha eki el arasyndaǵy agroónerkásiptik keshen ónimderiniń saýda kólemi 36,8%-ǵa ósip, 1,97 mlrd AQSh dollaryna jetti.
Taraptar saýda kólemin odan ári arttyrý jáne ózara jetkiziletin ónim túrlerin kóbeıtý úshin úlken múmkindik bar ekenin atap ótti.
Vıtse-mınıstr Qytaı tarabyna uzaq merzimdi yntymaqtastyq tetikterin qalyptastyrýǵa baǵyttalǵan birqatar usynysty tanystyrdy.
Atap aıtqanda, eki el arasynda jetkiziletin ónim túrlerin kóbeıtý, astyq pen maıly daqyldardy, sonyń ishinde Qytaıdyń strategııalyq qoryn qalyptastyrý úshin satyp alý kólemin arttyrý usynyldy.
Kelissózder barysynda aýyl sharýashylyǵy ónimderin saqtaý jáne qaıta óńdeý jobalaryna Qytaı ınvestıtsııalaryn tartý, sondaı-aq aýyl sharýashylyǵy ónimderin tasymaldaý men saqtaý júıesin damytý máseleleri qaraldy.
Qytaı taraby Qazaqstanmen agroónerkásiptik keshen salasyndaǵy yntymaqtastyqty odan ári nyǵaıtýdyń jáne belgilengen baǵyttar boıynsha birlesken jumysty jalǵastyrýdyń mańyzdylyǵyn atap ótti.
Kezdesý sońynda taraptar usynystardy odan ári pysyqtaýǵa jáne eki eldiń tıisti memlekettik organdary men kásipkerleri arasyndaǵy baılanysty kúsheıtýge ýaǵdalasty.
Sondaı-aq vıtse-mınıstr Hýnan provıntsııasynyń gýbernatory Mao Veımınmen kezdesti.
Onda Qazaqstan men Hýnan provıntsııasy arasyndaǵy naqty yntymaqtastyqty damytýǵa erekshe nazar aýdaryldy.
Azyq-túlik qaýipsizdigi salasyndaǵy seriktestikti jandandyrýmen qatar, Hýnan provıntsııasynyń gýbernatory Mao Veımın birlesken ǵylymı-tehnıkalyq yntymaqtastyqty damytý jáne tájirıbe almasýdy keńeıtý jóninde usynys jasady.
