Qazaqstan men Qytaı 62 mlrd dollarlyq 260 jobany júzege asyryp jatyr

Búginde bul baǵytta jalpy quny 62 mıllıard dollardan asatyn 260 birlesken iri joba júzege asyrylyp jatyr.

– Qytaılyq kásiporyndar Almatyda avtokólik klasterin damytýǵa belsendi atsalysyp keledi. Ortaq kúsh-jigerimizdiń arqasynda Qaraǵandy oblysynda kremnıı óndirisi iske qosyldy. Sonymen qatar metallýrgııa, munaı-gaz hımııasy jáne energııa jınaqtaý salalarynda irgeli bastamalar qolǵa alyndy. Ónimdiligi tómen munaı uńǵymalaryn qalpyna keltirý baǵytynda alǵashqy jobalar júzege asyrylyp jatyr. Qytaıdyń Jinyi Holding Group kompanııasymen birlesip, Aqtóbe oblysynda erekshe ındýstrııalyq aımaq qurylýda. Atalǵan aımaq halyqaralyq standarttarǵa sáıkes jumys isteıtin bolady. Agroónerkásip keshenin birlesip damytý jóninde birqatar ýaǵdalastyqqa qol jetkizdik, naqty bastamalardy júzege asyryp jatyrmyz. Sonyń ishinde Lihua, Fufeng, Dalian Hesheng Holdings kompanııalarynyń maqta-mata klasterin qalyptastyrýǵa jáne júgeri men bıdaıdy tereń óńdeýge arnalǵan mańyzdy jobalaryn erekshe atap ótkim keledi. Mundaı aýqymdy jumys seriktestigimizdi jańa deńgeıge kóterýge yqpal eteri sózsiz. Biz jekelegen ınvestıtsııalyq jobalardy júzege asyrý arqyly tolyqqandy óndiristik ekojúıe qalyptastyrýdy kózdeımiz. Bul qadam Ortalyq Azııa, Eýrazııalyq ekonomıkalyq odaq, Ońtústik Kavkaz jáne Eýropa elderiniń naryqtaryna birlesip shyǵýǵa múmkindik beredi. Osy oraıda «Common History Destiny. Designed and Made in Both China And Kazakhstan» dep atalatyn qazaq-qytaı baǵdarlamasyn iske qosýdy usynamyn. Úkimet qytaılyq seriktestermen birge keleshegi zor jobalardyń tizimin ázirlep, onyń bárin júzege asyrýǵa jedel kirisýi kerek, – dedi Qasym-Jomart Toqaev.

Memleket basshysy taý-ken metallýrgııasy keshenindegi yntymaqtastyqty taǵy bir basym baǵyt retinde atady. Onyń aıtýynsha, Qazaqstanda ýran, mys, altyn, kómir sekildi asa mańyzdy mıneraldar men sırek kezdesetin metaldardyń mol qory bar.

Prezıdent tsıfrlandyrý máselesine aıryqsha mán berdi. Ol elimizdiń álemdegi barlyq jetekshi tehnologııalyq ortalyqtarmen tyǵyz qarym-qatynas ornatýǵa ashyq ekenin málimdedi.

– Bıyl elimiz Dúnıejúzilik jasandy ıntellekt salasyndaǵy yntymaqtastyq uıymynyń quryltaıshylary qataryna kirdi. Osylaısha, Qazaqstan tehnologııalyq yqpaldastyqqa arnalǵan jańa halyqaralyq platformanyń qatysýshysy boldy. Bul bastamany QHR Tóraǵasy Sı Tszınpın kótergen bolatyn. Biz tehnologııa transferine, birlesken ınjenerlik jáne zertteý ortalyqtaryn qurýǵa múddelimiz. Bul rette jańa formatsııa mamandaryn daıarlaýǵa erekshe kóńil bólemiz. Elordada tuńǵysh qazaq-qytaı jasandy ıntellekt mektebin ashýǵa nıettimiz. Jemisti tehnologııalyq seriktestigimizdiń bir mysaly Alatau City jobasynan aıqyn kórinedi. Bul aýqymdy bastama Qytaı, Ortalyq Azııa jáne Eýropa keńistigindegi belsendi iskerlik qatynastar múıisine aınalýdy kózdeıdi, – dedi Memleket basshysy. 

Aıta ketelik Qazaqstan men Qytaıdyń saýda aınalymyn $100 mlrd-qa jetkizý kózdelip otyr.