Qazaqstan men Qyrǵyzstan únemi bir-birin qoldap júrýi kerek — Sadyr Japarov
ASTANA. KAZINFORM — Qyrǵyzstan Qazaqstanmen ekijaqty kelisimderdi tereńdetýge baǵyttalǵan saıasatyn júrgizip jatyr. Bul týraly Aqordada Joǵary memleketaralyq keńestiń otyrysynda Qyrǵyzstan Prezıdenti Sadyr Japarov aıtty.
«Qazaqstan Respýblıkasyna resmı saparmen kelýge shaqyrǵanyńyz úshin Qasym-Jomart Kemelulyna erekshe razylyǵymdy bildiremin. Qyrǵyz delegatsııasyna kórsetilip jatqan meımandostyqqa jáne kelissózdi myqty deńgeıde uıymdastyrǵany úshin jalpy Qazaqstan jaǵyna alǵysymdy aıtamyn», — dedi Sadyr Japarov.
Onyń aıtýynsha, Joǵary memleketaralyq keńestiń otyrysy eki el arasyndaǵy baılanystardy jańa sapaly deńgeıge kóteredi, sondaı-aq qazaq-qyrǵyz yntymaqtastyǵynyń damýyna yqpal etedi.
Sonymen qatar Qyrǵyzstan Prezıdenti búgingi kelissózder strategııalyq seriktestik rýhynda ótip jatqanyn atap ótti.
«Qyrǵyzstan Qazaqstanmen ekijaqty kelisimderdi tereńdetýge baǵyttalǵan saıasatyn júrgizip jatyr. Bizdiń elder arasynda eshqandaı saıası qarama-qaıshylyq joq. Osy oraıda bir-birimizdi qoldap, keleshekti oılap, tıisti máselelerdi birlese sheshý mańyzdy dep oılaımyn. Burynnan elderimiz yntymaqta, dostyq qarym-qatynasta bolyp, birtýǵan retinde bir-birine járdem berip, qoldaý jasap keledi», — dedi S. Japarov.
Budan buryn habarlanǵandaı, búgin Memleket basshysy Qasym-Jomart Toqaev Qazaqstanǵa resmı saparmen kelgen Qyrǵyzstan Prezıdenti Sadyr Japarovty Aqordada kútip aldy.
Qazaqstan Prezıdentiniń aıtýynsha, Sadyr Japarovtyń Astanaǵa sapary aıasynda tarıhı kelisimge qol qoıylady.
Memleket basshysy Joǵary memleketaralyq keńes qazaq-qyrǵyz qarym-qatynastaryna erekshe serpin beretinin aıtty.
