Qazaqstan men Qyrǵyzstan sý qoımalary boıynsha derekter almasýdy qaıta jandandyrady
ASTANA. KAZINFORM – Astanada Qazaqstan men Qyrǵyz Respýblıkasy delegatsııalarynyń gıdrometeorologııa salasyndaǵy yntymaqtastyqty jańǵyrtý, sondaı-aq Kırov, Orto-Tokoı jáne Toqtoǵul sý qoımalary boıynsha gıdrologııalyq derektermen almasý máselelerin talqylaý boıynsha kezdesýi ótti.
Qyrǵyz tarapyn Tótenshe jaǵdaılar mınıstriniń birinshi orynbasary Azamat Mámbetov, qazaqstandyq tarapty Sý resýrstary jáne ırrıgatsııa birinshi vıtse-mınıstri Nurlan Aldamjarov basqardy.
Kezdesý 2025 jylǵy 12-13 qarashada Astana qalasynda ótken Qazaq-qyrǵyz úkimetaralyq keńesiniń XIII otyrysynyń hattamasyn iske asyrý aıasynda ótti. Kezdesý qorytyndysy boıynsha «Qazgıdromet» RMK men Qyrǵyz Respýblıkasy Tótenshe jaǵdaılar mınıstrligi janyndaǵy Gıdrometeorologııalyq qyzmet arasynda 2026-2028 jyldarǵa arnalǵan jedel-óndiristik qyzmet salasyndaǵy yntymaqtastyq baǵdarlamasyna qol qoıyldy.
Sý resýrstary jáne ırrıgatsııa mınıstrligi málimetinshe, qujat ózender men sý qoımalary boıynsha jedel gıdrologııalyq aqparat almasýdy, basseındik aǵyndy sýlar men jaýyn-shashyn boljamymen almasýdy, daýyldy eskertýler men habarlamalardy ózara joldaýdy, sondaı-aq tájirıbe jáne birlesken ǵylymı-tehnıkalyq qyzmetpen almasýdy kózdeıdi.
– Bul qujatqa qol qoıý – sý dıplomatııasy men qos memlekettiń mamandary arasyndaǵy kópjyldyq kelissózderdiń nátıjesi. Bul ekijaqty ózara is-qımyldy damytýdyń mańyzdy kezeńi ári memleketterimizdiń tótenshe jaǵdaılardyń aldyn alý jáne saldaryn joıý salasyndaǵy yntymaqtastyqty nyǵaıtýǵa degen ortaq múddesin kórsetedi. Baǵdarlamany iske asyrý birlesken is-qımyldardyń tıimdiligin arttyrýǵa, praktıkalyq ózara is-qımyldy damytýǵa jáne jedel den qoıý tetikterin jetildirýge baǵyttalǵan. Sý qoımalary boıynsha derektermen ýaqytyly almasý transshekaralyq ózenderdiń tómengi aǵysyndaǵy halyq pen ınfraqurylymnyń qaýipsizdigin qamtamasyz etýde, ásirese tasqyn jáne sý basý kezeńderinde sheshýshi ról atqarady, - dedi Sý resýrstary jáne ırrıgatsııa birinshi vıtse-mınıstri Nurlan Aldamjarov.
Aıta keteıik, Ortalyq Azııa elderiniń sý vedomstvolary Shardara sý qoımasyna qatysty kelisimge keldi.
Jambyl oblysynda eki jańa sý qoımasynyń qurylysy bastalady.