Qazaqstan men Qyrǵyzstan SІM basshylary Cholpon-Atada ne talqylady
ASTANA. KAZINFORM — Qazaqstan Respýblıkasynyń Premer-mınıstriniń orynbasary – Syrtqy ister mınıstri Murat Nurtileý Qyrǵyz Respýblıkasyna jasaǵan resmı sapary aıasynda Qyrǵyzstan Syrtqy ister mınıstri Jeenbek Kýlýbaevpen kezdesti, dep habarlaıdy Kazinform agenttiginiń menshikti tilshisi.
Qyrǵyzstan SІM málimetinshe, taraptar eki el arasyndaǵy saıası, saýda-ekonomıkalyq, tranzıt-kólik, sý-energetıka, mádenı-gýmanıtarlyq jáne kóshi-qon salalaryndaǵy ózara is-qımyldyń negizgi aspektilerin talqylap, sondaı-aq halyqaralyq jáne óńirlik uıymdar aıasyndaǵy ózara is-qımyl jóninde pikir almasty.
Kezdesýshi taraptar joǵary jáne asa joǵary deńgeıdegi senimdi saıası dıalog deńgeıine qol jetkizilgenine ózara qanaǵattanýshylyq bildirip, ekijaqty yntymaqtastyqty odan ári nyǵaıtý jáne keńeıtýge nıetti ekenderin rastady.
Atap ótilgendeı, negizgi basymdyq saýda-ekonomıkalyq baılanystardy damytýǵa, birlesken ınvestıtsııalyq jobalardy júzege asyrýǵa, qazaqstan-qyrǵyz shekarasyndaǵy ótkizý pýnktterin jańǵyrtýǵa, taýarlar men adamdardyń erkin qozǵalysyn qamtamasyz etýge berildi.
Murat Nurtileý men Jeenbek Kýlýbaev memleket basshylary men úkimetteri deńgeıinde qol jetkizilgen kelisimderdiń iske asyrylý barysyn, sondaı-aq jyl sońyna deıin josparlanǵan ekijaqty kezdesýler men saparlardy uıymdastyrý máselelerin qarastyrdy. Qazaqstan Prezıdenti Qasym-Jomart Toqaevtyń Qyrǵyzstanǵa resmı saparyna daıyndyq jumystaryna erekshe nazar aýdaryldy.
Kelissózder qorytyndysy boıynsha eki eldiń syrtqy saıası vedomstvolarynyń basshylary Qazaqstan Respýblıkasy men Qyrǵyz Respýblıkasy arasyndaǵy Joǵary memleketaralyq keńestiń jetinshi otyrysynyń qujattaryn parafırledi. Atalǵan otyrys jaqyn arada eki el prezıdentteriniń tóraǵalyǵymen ótedi dep josparlanyp otyr.
Eske sala ketsek, buǵan deıin Cholpon-Atada Qyrǵyzstan Prezıdenti Sadyr Japarov Qazaqstan Syrtqy ister mınıstri Murat Nurtileýmen kezdesken bolatyn.