Qazaqstan men Qyrǵyzstan syrtqy saıası baılanystaryn nyǵaıtyp otyr

BІShKEK. KAZINFORM – Qazaqstan Respýblıkasy Syrtqy ister mınıstri Ermek Kósherbaevtiń Bishkekke resmı sapary aıasynda Qyrǵyzstan Syrtqy ister mınıstrliginiń basshysy Jeenbek Kýlýbaevpen kezdesýi ótti, dep habarlaıdy Kazinform menshikti tilshisi.

Kelissóz barysynda taraptar saıası, saýda-ekonomıkalyq, kóliktik-logıstıkalyq, sý-energetıkalyq jáne mádenı-gýmanıtarlyq salalardaǵy ekijaqty yntymaqtastyqtyń qazirgi jaǵdaıy men bolashaǵyn, sondaı-aq taraptardyń aımaqtyq jáne halyqaralyq uıymdar aıasyndaǵy ózara is-qımylyn talqylady.

Ermek Kósherbaev pen Jeenbek Kýlýbaev eki memleket basshylarynyń qoldaýy men saıası erik-jigeriniń arqasynda senimdi saıası dıalogtyń joǵary deńgeıin atap ótti, sondaı-aq ekijaqty yntymaqtastyqty odan ári nyǵaıtý jáne keńeıtýge degen berik nıetterin rastady.

Taraptar saýda-ekonomıkalyq baılanystardy keńeıtý áleýetin talqylady. Birlesken ınvestıtsııalyq jobalardy júzege asyrý máselelerine basa nazar aýdaryldy, onyń ishinde shekaralas aımaqta ónerkásiptik saýda-logıstıkalyq keshen qurý, sondaı-aq Almaty oblysynda kókónis-jemisti saqtaýǵa arnalǵan kóterme-úılestirý ortalyǵyn qurý, Ystyqkól-Almaty balama tasjolyn salý jáne qazaq-qyrǵyz shekarasynda shekara ótkelderin jańǵyrtý bar.

Kezdesýde sondaı-aq energetıka jáne sý resýrstary, kólik jáne logıstıka salasyndaǵy praktıkalyq ózara árekettestik, úkimetaralyq kelisim negizinde Qazaqstannan Qyrǵyzstanǵa munaı jáne munaı ónimderin jetkizý tetigin ázirleý máseleleri qaraldy. Aýyl sharýashylyǵy jáne ónerkásiptik kooperatsııa salasynda aımaqaralyq yntymaqtastyqtyń iske asyrylmaǵan áleýetin zertteý boıynsha kelisimge qol jetkizildi.

Osyǵan deıin Qazaqstan men Qyrǵyzstan SІM basshylary telefon arqyly sóıleskenin jazdyq.

Basshylar ótken jyldy qorytyndylap, baýyrlastyq pen tatý kórshilik rýhyndaǵy qazaq-qyrǵyz odaqtastyq qatynastarynyń júıeli ári ornyqty damyp kele jatqanyn atap ótti.