Qazaqstan men Qyrǵyzstan Shý-2 aınalma kanalyn salý máselesin talqylady
Sý resýrstary jáne ırrıgatsııa mınıstri Nurjan Nurjigitov Qyrǵyz Respýblıkasyna jumys sapary aıasynda kórshi eldiń Aýyl sharýashylyǵy mınıstri Asqarbek Jánibekovpen kezdesti. Taraptar Shý-2 aınalma kanalyn salý máselesin talqylady, dep habarlaıdy Kazinform.
Kezdesýge eki eldiń ǵylymı uıymdarynyń sarapshylary da qatysty.
Kezdesý qorytyndysy boıynsha taraptar sarapshylardy barlyq qajetti materıaldarmen qamtamasyz etý jáne gıdrologııalyq jáne gıdrogeologııalyq baqylaý júrgizý úshin jaǵdaı jasaý týraly kelisimge keldi.
Endi qazaqstandyq ǵalymdarǵa Shý ózeni basseıniniń gıdrogeologııalyq derekqory qoljetimdi bolady.
Sondaı-aq jumys toptarynyń basshylary Shý-2 aınalma kanalyn salýdyń ekojúıege yqtımal áserin zertteý maqsatynda qoldaý kórsetý úshin jáne sarapshylardy usyný úshin halyqaralyq yntymaqtastyq jónindegi German qoǵamyna (GIZ) birlesken ótinish hatqa qol qoıdy.
«Biz aınalma kanal qurylysynyń boljamdy ornyn qarastyrdyq. Búkil yqtımal áserdi jan-jaqty zertteý óte mańyzdy. Sol sebepti halyqaralyq sarapshylardy tartýdy josparlap otyrmyz», - dedi Sý resýrstary jáne ırrıgatsııa mınıstri.
