Qazaqstan men Qyrǵyzstan shekarasyndaǵy eki ótkizý beketine halyqaralyq mártebesi beriledi

ASTANA. KAZINFORM – Qazaqstan Qyrǵyzstanmen shekaradaǵy ótkizý beketteri týraly hattamany ratıfıkatsııalaýǵa daıyndalyp jatyr.

Bul zań jobasyn QR Kólik mınıstrligi usyndy.

«Kamyshanovka» ótkizý beketi «Aqsý» (Qazaqstan) jáne «Tómónkú-Chúı» (Qyrǵyzstan) degen jańa ataýǵa ıe bolady. Ol táýlik boıyna jumys isteıdi. Buǵan qosa «Kamyshanovka» jáne «Besaǵash» ekijaqty beketterine endi halyqaralyq degen mártebe beriledi.

Qujatty ratıfıkatsııalaý tranzıttik-kólik áleýetin keńeıtip, eki eldiń saýda-ekonomıkalyq baılanystaryn nyǵaıtyp, ózge kólik ótkizý beketterindegi júktemeni azaıtady.

Nátıjesi halyqaralyq kelisimge qol qoıylǵannan keıin 1 jyldyń kóleminde biline bastaıdy degen senim bar. Qujat jobasy 3 qazanǵa deıin kópshilik talqylaýyna usynylady.

Osyǵan deıin Reseımen shekaradaǵy pavlodarlyq ótkizý beketterin jańartý jumystary bastalǵany týraly jazdyq.