Qazaqstan men Qyrǵyzstan shekarasynda halyqaralyq ótkizý pýnkti salynady
ASTANA. KAZINFORM — Shý oblysynyń Soqulyq aýdanyndaǵy Kamyshanovka aýylynda Qazaqstan men Qyrǵyzstan shekarasynda «Tómónkú-Chúı» halyqaralyq avtomobıl ótkizý pýnktiniń qurylysy bastaldy, dep habarlaıdy Kazinform agenttiginiń Bishkektegi menshikti tilshisi.
Qurylystyń bastalýyna arnalǵan rásimde Qyrǵyzstan Memlekettik shekara qyzmetiniń tóraǵasy Danııar Satımov jańa keshen azamattardyń ıgiligi men Qazaqstan men Qyrǵyzstan arasyndaǵy kólik qatynasyn damytýǵa baǵyttalǵanyn atap ótti.
– Bul ótkizý pýnktiniń qurylysy elimizdegi eń iri ınfraqurylymdyq jobalardyń biri deýge bolady. Basty maqsatymyz – memlekettik shekaradan ótetin azamattarǵa zamanaýı ári qolaıly jaǵdaı jasaý, kólik qozǵalysy men júk tasymalyn tıimdi uıymdastyrý. Jańa keshen shekaradan ótý ýaqytyn qysqartyp, bul úderisti barynsha yńǵaıly ári qaýipsiz etedi. Sondaı-aq shekarashylardyń qyzmet atqarýyna qolaıly jaǵdaı jasaıdy, – dedi Shekara qyzmetiniń basshysy.
Atalǵan joba azamattardyń memlekettik shekaradan barynsha qolaıly, jyldam ári qaýipsiz ótýine, kólik qozǵalysy men júk tasymalynyń kedergisiz júrýine, sondaı-aq kútý jáne shekaralyq baqylaýdan ótý ýaqytyn qysqartýǵa baǵyttalǵan.
Vedomstvonyń habarlaýynsha, jańa ótkizý pýnkti 33,06 gektar aýmaqty alyp jatyr. Keshen táýlik boıy jumys istep, eki baǵytta da azamattar men kólik quraldarynyń, sondaı-aq júkterdiń ótýin qamtamasyz etedi.
Joba aıasynda avtokólikterge arnalǵan segiz qozǵalys jolaǵy men pasporttyq baqylaýdan ótetin 12 kabına salý kózdelgen. Sonymen qatar pasporttyq baqylaý rásimin jeńildetip, jedeldetý úshin E-gate avtomattandyrylǵan elektrondy qaqpalaryn ornatý josparlanǵan.
Jańa ótkizý pýnktiniń aýmaǵynda ákimshilik jáne qyzmettik ǵımarattar, kólikterdi tekserý oryndary, avtokólikter jınalatyn alańdar, ınjenerlik-tehnıkalyq qurylystar men jeke quramnyń tynys-tirshiligin qamtamasyz etetin nysandar boı kóteredi. Al qurylys eki jylǵa sozylady.
Eske sala keteıik, 2025 jylǵy 25 tamyzdan bastap Qazaqstan men Qyrǵyzstan shekarasyndaǵy «Qarqara» avtomobıl ótkizý pýnkti táýlik boıy jumys isteý rejımine kóshti.
Buǵan deıin Qazaqstan-Qyrǵyzstan shekarasyndaǵy Jambyl oblysynda ornalasqan «Qarasý» avtomobıl ótkizý pýnktiniń elektrondy kezek júıesine qosylǵany habarlanǵan bolatyn.
Sonymen qatar Qyrǵyzstanda baqylaý beketiniń qyzmetkerleri júk kólikterin ótkizý úshin para alǵanyn jazǵan edik.
