Qazaqstan men Qyrǵyzstan shekara mańyndaǵy agroónimder saýdasyn jandandyrmaq
ASTANA. KAZINFORM — Bıyl agroónerkásiptik ónimder boıynsha eki el arasyndaǵy taýar aınalymy 43,5%-ǵa ósip, 99,9 mln AQSh dollaryna jetti, dep habarlaıdy Saýda jáne ıntegratsııa mınıstrligi.
Qazaqstan men Qyrǵyzstannyń aýyl sharýashylyǵy salasyndaǵy yntymaqtastyq jónindegi jumys tobynyń ekinshi otyrysy ótti. Otyrysqa Qazaqstan Respýblıkasy Aýyl sharýashylyǵy vıtse-mınıstri Baǵlan Bekbaýov pen Qyrǵyz Respýblıkasy Sý resýrstary, aýyl sharýashylyǵy jáne qaıta óńdeý ónerkásibi mınıstriniń orynbasary Samat Nasırdınov teń tóraǵalyq etti. Sonymen qatar, jıynǵa Qazaqstan Respýblıkasynyń Saýda jáne ıntegratsııa mınıstrligi Saýda komıtetiniń tóraǵasy Aıdar Ábildabekov qatysty.
Kezdesý barysynda taraptar Úkimetaralyq keńestiń 12-shi otyrysynda qol jetkizilgen ýaǵdalastyqtardyń oryndalý barysyn, 2024–2025 jyldarǵa arnalǵan aýyl sharýashylyǵy ónimderin ózara jetkizýdi ulǵaıtý jónindegi Jol kartasynyń iske asyrylýyn jáne agrarlyq saladaǵy ekijaqty yntymaqtastyqtyń ózekti máselelerin talqylady.
Vıtse-mınıstr Baǵlan Bekbaýov agroónerkásiptik ónimder boıynsha eki el arasyndaǵy taýar aınalymynyń turaqty ósim kórsetip otyrǵanyn atap ótti.
— 2024 jyly bul kórsetkish 350,9 mln AQSh dollaryn qurap, ótken jylmen salystyrǵanda 8,4%-ǵa artqan. Al 2025 jyldyń birinshi toqsanynda taýar aınalymy 43,5%-ǵa ósip, 99,9 mln AQSh dollaryna jetti. Onyń ishinde Qazaqstannan eksport kólemi 80,1 mln dollardy qurap, 44,3%-ǵa, al ımport kólemi 19,8 mln dollardy qurap, 39%-ǵa ósken, — delingen habarlamada.
Kezdesý barysynda qyrǵyz aýyl sharýashylyǵy ónimderiniń jármeńkesin Astana qalasynda pılottyq formatta ótkizý usynysy qoldaý tapty. Aldaǵy ýaqytta mundaı sharalardy Qazaqstannyń ózge de óńirlerinde ótkizý múmkindigi qarastyrylady.
Shekara mańyndaǵy aýyl sharýashylyǵy ónimderiniń saýdasyn damytý máselesine oraı taraptar Qyrǵyz Respýblıkasynyń Talas oblysy men Qazaqstan Respýblıkasynyń Jambyl oblysy arasyndaǵy saýdany jandandyrý boıynsha jergilikti atqarýshy organdardyń qatysýymen naqty is-sharalardy pysyqtaýǵa ýaǵdalasty. Sonymen qatar, shekaralyq ótkizý beketterinde júk kólikteriniń ótkizý qabiletin arttyrý boıynsha sharalar qaraldy.
Qazaqstandyq bıdaıdyń jetkizilim kólemin ulǵaıtý maqsatynda temirjol tasymaly tarıfterin ońtaılandyrý máselesi de múddeli uıymdardyń qatysýymen birlesip qaralatyn boldy.
Sondaı-aq, «Kyrgyz-Agroholdıng» AAQ pen «QazTrade» saýda saıasatyn damytý ortalyǵy» AQ arasynda aýyl sharýashylyǵy ónimderin ózara jetkizý boıynsha bir aı ishinde memorandýmǵa qol qoıýǵa járdemdesý jóninde kelisimge qol jetkizildi. Qujatta satyp alý kóleminiń boljamdy jospary kórsetilmek.
Otyrystyń qorytyndysy boıynsha qol jetkizilgen ýaǵdalastyqtar men bolashaq yntymaqtastyq baǵyttaryn qamtıtyn hattamaǵa qol qoıyldy.
Budan buryn Qazaqstan men Qyrǵyzstan shekarasynda shegirtkege qarsy birlesken tekserý bastalǵanyn jazdyq.