Qazaqstan men Qyrǵyzstan saıası jáne ekonomıkalyq yntymaqtastyqty keńeıtedi
ASTANA. KAZINFORM — Jaqyn arada Parlament Májilisi «Qazaqstan Respýblıkasy men Qyrǵyz Respýblıkasy arasyndaǵy odaqtastyq qatynastardy tereńdetý jáne keńeıtý týraly shartty ratıfıkatsııalaý týraly» zań jobasyn talqylaıdy. Osy qujat palatanyń qaraýyna kelip tústi.
— Bul shartqa Astanada byltyr 19 sáýirde qol qoıyldy. Qujattyń maqsaty — Qazaqstan men Qyrǵyzstan yntymaqtastyǵynyń keshendi damýyna jańa qýatty serpin berý. Shartta saıası jáne ekonomıkalyq salalardaǵy ózara tıimdi yntymaqtastyqty keńeıtý, sondaı-aq ózara is-qımyldy belsendi damytý eskerilgen. Májilistiń Halyqaralyq ister, qorǵanys jáne qaýipsizdik komıteti atalǵan zań jobasy boıynsha qorytyndy ázirleýge daıyn, — dedi Májilis depýtaty Aıgúl Quspan palatanyń jalpy otyrysynda.
Eske salsaq, jaqynda Memleket basshysy Qasym-Jomart Toqaev Qyrǵyzstannyń Syrtqy ister mınıstri Jeenbek Kýlýbaevty qabyldady.