Qazaqstan men Qyrǵyzstan saýda kólemin 3 mlrd dollarǵa jetkizýdi kózdeıdi
ASTANA. KAZINFORM — Qyrǵyzstanǵa resmı saparmen kelgen eldiń Premer-mınıstri Oljas Bektenov Qazaqstan men Qyrǵyzstannyń «Strategııalyq áriptestikti damytýdaǵy óńirlerdiń róli» atty II óńiraralyq yntymaqtastyq forýmyna qatysyp jatyr, dep habarlaıdy Kazinform agenttiginiń Bishkektegi menshikti tilshisi.
Oljas Bektenov quttyqtaý sózinde Qazaqstan Qyrǵyzstanmen strategııalyq áriptestikti jan-jaqty damytýǵa aıryqsha mán beretinin atap ótti.
— Prezıdent Qasym-Jomart Toqaevtyń basshylyǵymen biz barlyq elmen ashyq ári syndarly áriptestikke negizdelgen Ádiletti ári Progressıvti Qazaqstandy qurý jolynda júıeli jumys istep kelemiz. Mundaı ustanym ekonomıkany nyǵaıtýǵa, ınvestıtsııalyq tartymdylyqty arttyrýǵa, halyqaralyq yntymaqtastyqty keńeıtýge jáne bıznes júrgizýge qolaıly jaǵdaı jasaýǵa múmkindik beredi. Búgingi forým memleketterimizdiń basshylary qoıǵan ekijaqty taýar aınalymyn 3 mlrd dollarǵa deıin jetkizý mindetin oryndaýǵa eleýli úles qosatynyna senimdimin, — dedi Qazaqstan Premer-mınıstri.
Sonymen qatar Oljas Bektenov Qyrǵyzstan Qazaqstannyń mańyzdy saýda seriktesteriniń biri ekenin aıtty.
— Ótken jyldyń qorytyndysy boıynsha eki el arasyndaǵy saýda kólemi 33 paıyz ósip, 2,3 mlrd dollarǵa jetti. Bul ekijaqty baılanystyń turaqty damyp kele jatqanyn kórsetedi. Al 2026 jyldyń segiz aıynda taýar aınalymy taǵy 20 paıyz artty. 2005 jyldan beri qazaqstandyq kompanııalar Qyrǵyzstan ekonomıkasyna 1,3 mlrd dollarǵa jýyq ınvestıtsııa saldy. Qazaqstanda qyrǵyz kapıtaly bar 3,5 myń kásiporyn tabysty jumys istep jatyr. Sondaı-aq Qyrǵyzstanda qazaqstandyq kapıtaly bar 400-ge jýyq kompanııa qyzmetin júzege asyryp keledi, — dedi ol.
Qazaqstan Premer-mınıstriniń pikirinshe, eki el arasyndaǵy ınvestıtsııalyq yntymaqtastyqtyń áleýeti áldeqaıda joǵary.
– Qazaqstan birlesken jobalardy odan ári júzege asyrýǵa jáne olardyń sanyn arttyrýǵa múddeli. Bul baǵytta óńiraralyq yntymaqtastyqqa aıryqsha mán beriledi, – dedi Premer-mınıstr.
Eske sala keteıik, buǵan deıin Qazaqstan Premer-mınıstri Oljas Bektenovtiń resmı saparmen Qyrǵyzstanǵa barǵanyn habarlaǵan bolatynbyz.
Sonymen qatar Bishkekte Qazaqstan men Qyrǵyzstannyń II óńiraralyq jıyny bastalǵanyn jazǵan edik.
