Qazaqstan men Qyrǵyzstan saýda aınalymyn arttyrý máselelerin talqylady
ASTANA. KAZINFORM — Bishkekte Qazaqstan Respýblıkasynyń Premer-mınıstri Oljas Bektenov pen Qyrǵyz Respýblıkasynyń Mınıstrler kabınetiniń tóraǵasy – Prezıdent Ákimshiliginiń basshysy Ádilbek Qasymalıevtiń qatysýymen Qazaq-qyrǵyz úkimetaralyq keńesiniń 14-shi otyrysy ótti, dep habarlaıdy Kazinform agenttiginiń menshikti tilshisi.
QR Premer-mınıstri Oljas Bektenov Qyrǵyzstannyń tatý kórshi, baýyrlas halyq jáne mańyzdy saýda-ekonomıkalyq seriktes ekenin atap ótti.
— Qazaqstan Respýblıkasynyń Prezıdenti Qasym-Jomart Kemeluly Toqaev pen Qyrǵyz Respýblıkasynyń Prezıdenti Sadyr Nýrgojoevıch Japarovtyń birlesken kúsh-jigeri men tikeleı qoldaýynyń arqasynda elderimiz arasyndaǵy odaqtastyq baılanystar jańa deńgeıge kóterildi. Bizdiń maqsatymyz — memleketterimizdiń basshylary aıqyndap bergen barlyq mindetterdi tolyq júzege asyrý. Saýda qatynastaryn odan ári arttyrý úshin kólik-tranzıt, aýyl sharýashylyǵy jáne ekonomıkanyń basqa da salalaryndaǵy yqpaldastyqty damyta túsý kerek. Jalpy Qazaqstan men Qyrǵyzstan arasynda ekijaqty qatynastardyń barlyq spektri boıynsha úlken áleýet bar. Biz olardy naqty júzege asyrýǵa daıyn ekenimizdi rastaımyz, — dedi Oljas Bektenov.
Kezdesý barysynda Ádilbek Qasymálıev Qazaqstanda júrgizilip jatqan reformalardy shynaıy rızashylyqpen baqylap otyrǵanyn atap ótti. Ol qos halyqty ǵasyrlar boıy qalyptasqan tarıhı, rýhanı jáne baýyrlastyq baılanystar biriktiretinin atap ótti.
— Sońǵy jyldary memleket basshylary arasyndaǵy senimdi qarym-qatynastyń arqasynda ekijaqty yntymaqtastyq sapa turǵysynan jańa deńgeıge kóterildi, al Prezıdent Qasym-Jomart Toqaevtyń byltyrǵy resmı sapary eki el arasyndaǵy qarym-qatynastyń odaqtyq sıpatyn rastady. Sizdiń búgingi resmı saparyńyz ekijaqty yntymaqtastyqty odan ári nyǵaıtýǵa yqpal etetinine senimdimin, — dedi Qyrǵyz Respýblıkasynyń Mınıstrler kabınetiniń basshysy.
Shaǵyn jáne keńeıtilgen quramdaǵy kezdesýde taraptar saýda-ekonomıka, aýyl sharýashylyǵy, sý sharýashylyǵy, kólik jáne tranzıt, ǵaryshty zertteý, avıatsııa, tsıfrlandyrý, mádenı-gýmanıtarlyq qatynastar sııaqty basym salalardaǵy ekijaqty yntymaqtastyqty tereńdetý máselelerin talqylady.
Kezdesý qorytyndysy boıynsha Qazaq-qyrǵyz úkimetaralyq keńesiniń 14-shi otyrysynyń qorytyndy hattamasyna qol qoıyldy. Taraptar Qazaqstan men Qyrǵyzstan arasyndaǵy baılanysty nyǵaıtý jáne óńirdiń turaqty damýyn qamtamasyz etý boıynsha qol jetkizilgen ýaǵdalastyqtardy naqty júzege asyrýǵa degen mindettemelerin rastady.
Eske sala keteıik, keshe Qazaqstan Respýblıkasynyń Premer-mınıstri Oljas Bektenov Qyrǵyz Respýblıkasyna resmı saparmen keldi.
Bishkekte eki el úkimet basshylarynyń qatysýymen 2-shi Qazaqstan-Qyrǵyzstan aımaqaralyq yntymaqtastyq forýmy ótti.
Qazaqstan men Qyrǵyzstan ІІ óńiraralyq yntymaqtastyq forýmynda qandaı qujattarǵa qol qoıǵanyn myna jerden oqyńyz.
