Qazaqstan men Qyrǵyzstan parlamentaralyq yntymaqtastyq keńesiniń úshinshi otyrysy ótti
ASTANA. KAZINFORM – Qazaqstan Parlamenti Májilisiniń tóraǵasy Erlan Qoshanov pen Qyrǵyz Respýblıkasy Jogorký Keneshiniń tóraǵasy Nýrlanbek Týrgýnbek ýýlý Astanada Qazaqstan-Qyrǵyzstan parlamentaralyq yntymaqtastyq keńesiniń úshinshi otyrysyn ótkizdi.
Onda taraptar ekijaqty yntymaqtastyqty keńeıtý jáne parlamentaralyq baılanysty damytý boıynsha joǵary deńgeıdegi kelisimderdi júzege asyrý barysyn talqylady.
Jogorký Kenesh delegatsııasyn qarsy alǵan Májilis spıkeri qazaq pen qyrǵyz halyqtaryn ejelden ortaq tarıhy, uqsas tili, salt-dástúri men mádenıeti biriktiretinin atap ótti. Al eki el arasyndaǵy dostyq pen tatý kórshilik qarym-qatynastyń tamyry tereńde jatyr.
— Memleket basshylarymyz Qasym-Jomart Kemeluly Toqaev pen Sadyr Nýrgojoevıch Japarovtyń salıqaly saıasatynyń, ózara túsinistik pen dostyǵynyń arqasynda búginde eki el arasyndaǵy yntymaqtastyq óte qarqyndy damyp keledi. Bizdiń kóshbasshylarymyzdyń ekijaqty kezdesýleriniń qarqyndylyǵy parlamentaralyq baılanystardyń jıiligine de tikeleı áser etedi. Bizdiń endigi maqsatymyz — osy ekpindi saqtap, odan ári nyǵaıtý, — dedi Erlan Qoshanov.
Májilis spıkeri Prezıdentterimiz yqpaldastyqtyń basym baǵyttaryn aıqyndap, olardy júzege asyrý úshin naqty mindetter júktegenin basa aıtty. Onyń negizgileriniń biri — 2030 jylǵa qaraı eki el arasyndaǵy taýar aınalymyn 3 mıllıard AQSh dollaryna deıin jetkizý. Májilis eki apta buryn ratıfıkatsııalaǵan Qazaqstan men Qyrǵyzstan arasyndaǵy odaqtastyq qatynastardy tereńdetý jáne keńeıtý týraly shartta yntymaqtastyqtyń jańa ınstıtýtsıonaldyq negizderi aıqyn kórsetilgen.
— Bul aýqymdy qujat parlamentaralyq baılanysty nyǵaıtý úshin jańa múmkindikter berip otyr. Bizdiń parlamentterge joǵary deńgeıde qol jetkizilgen ýaǵdalastyqtardyń iske asyrylýyn qadaǵalaý fýnktsııasy júktelgen. Osy rette eki el úkimeti belsendi jumys istep jatqanyn atap ótken jón. Óz kezeginde bizdiń parlamentter olardy zańnamalyq turǵydan qoldaýdy qamtamasyz etýde, — dedi Erlan Qoshanov.
Sondaı-aq ol qazaq-qyrǵyz qarym-qatynasynyń barlyq salasyn qamtıtyn 150-den astam qujattan turatyn berik sharttyq-quqyqtyq bazasy qalyptasqanyn aıtty. Olardyń ishindegi eń mańyzdylary — Investıtsııalardy kótermeleý jáne ózara qorǵaý týraly kelisim, «Qarasý» jáne «Aq-Tilek» avtojol ótkizý pýnktteri mańynda ındýstrııalyq saýda-logıstıkalyq keshendi qurý jáne onyń qyzmetin retteý týraly kelisim.
Óz kezeginde Nýrlanbek Týrgýnbek ýýlý ekijaqty máselelerdi sheshýde Parlamentaralyq yntymaqtastyq keńesiniń rólin erekshe atap ótti.
— Búgingi Parlamentaralyq keńestiń otyrysy jaı ǵana josparly kezdesý emes. Bul — eki jaqyn memlekettiń arasyndaǵy ashyq ári syndarly dıalogtyń jalǵasy. Osy turǵyda parlamenttik dıalogtyń orny erekshe. Parlamentter halyqtyń múddesin qorǵaıdy. Demek, parlamentaralyq yntymaqtastyq arqyly biz ózara túsinistikti qoldap qana qoımaı, ony tereńdete alamyz. Birlesken is-áreketter arqyly ortaq múddelerdi halyqaralyq alańdarda qorǵaýǵa múmkindik jasaımyz, — dedi Jogorký Kenesh tóraǵasy.
Keńes otyrysy barysynda depýtattar saýda-ekonomıka jáne logıstıka salalaryndaǵy áriptestikti nyǵaıtý máselelerin ortaǵa saldy. Atap aıtqanda, Qazaqstan-Qyrǵyzstan shekarasyndaǵy Indýstrııalyq saýda-logıstıkalyq keshen qurylysyn odan ári júzege asyrý, shekaralyq baqylaý-ótkizý pýnktteriniń ınfraqurylymyn jaqsartý jumystaryn jandandyrý, sondaı-aq Almaty-Ystyqkól avtojolyn salý jobasy bar.
Sonymen qatar taraptar ekijaqty formatta jáne Ortalyq Azııa elderi áıelderiniń dıalogy, TúrkPA jáne basqa da halyqaralyq parlamenttik uıymdar aıasynda yntymaqtastyqty damytýdyń mańyzdylyǵyn atap ótti.
Otyrysta ınvestıtsııalyq, mádenı-gýmanıtarlyq yntymaqtastyq máseleleri, týrızm, ekologııa jáne klımattyń ózgerýi salalaryndaǵy jobalar da qarastyryldy. Májilis spıkeri Qyrǵyzstannyń muzdyqtardy saqtaý jáne halyqaralyq taý dıalogyn belsendi damytý jónindegi bastamalaryn qoldaıtynyn aıtyp, Halyqaralyq Araldy qutqarý qory aıasyndaǵy jumysty odan ári jalǵastyrýǵa shaqyrdy.
Sapar aıasynda parlamentter delegatsııalary Qalıbek Qýanyshbaev atyndaǵy Qazaq ulttyq mýzykalyq-drama teatryna barady. Qonaqtardyń nazaryna Shyńǵys Aıtmatovtyń áıgili shyǵarmasy boıynsha Qazaqstannyń halyq ártisi Talǵat Temenov qoıǵan «Qyzyl oramaldy shynarym» dramasy usynylady.
Aıta ketelik Qyrǵyzstan Parlamentiniń tóraǵasy QR Prezıdenti Teleradıokesheninde boldy.