Qazaqstan men Qyrǵyzstan ózara saýda kólemin 2 mlrd dollarǵa deıin jetkizbek
ASTANA. KAZINFORM - Qyrǵyz tarapynyń shaqyrýymen Qazaqstan Respýblıkasy Premer-Mınıstriniń orynbasary – Syrtqy ister mınıstri Murat Nurtileý Bishkekke alǵashqy resmı saparmen keldi QR Syrtqy ister vedomstvosynyń baspasóz qyzmeti.
Baspasóz qyzmetiniń málimetterine qaraǵanda, Qyrǵyz Respýblıkasynyń Syrtqy ister mınıstri Jeenbek Kýlýbaevpen kelissózder barysynda ekijaqty yntymaqtastyqtyń keń aýqymdy máseleleri, saıası, saýda-ekonomıkalyq, ınvestıtsııalyq jáne mádenı-gýmanıtarlyq ózara is-qımyldyń basym baǵyttary qaraldy. Dostyq, baýyrlastyq, qurmet pen tatý kórshilik negizinde odaqtastyqty tereńdetýge ózara beıildik rastaldy.
Qazaqstan SІM basshysy M.Nurtileý asa joǵary jáne joǵary deńgeılerde senimdi dıalogty odan ári nyǵaıtýdyń mańyzdylyǵyn atap ótti. Osyǵan baılanysty taraptar Qyrǵyzstan Prezıdenti Sadyr Japarovtyń 2021 jylǵy naýryzdaǵy Qazaqstanǵa memlekettik sapary jáne Qazaqstan Prezıdenti Qasym-Jomart Toqaevtyń 2022 jylǵy mamyrdaǵy Qyrǵyzstanǵa resmı sapary sheńberinde qol jetkizilgen ýaǵdalastyqtardy iske asyrý máselelerine erekshe nazar aýdardy.
«Bizdiń elderimiz senimdi odaqtastar, óte jaqyn jáne baýyrlas memleketter. Biz dostyqtyń myzǵymas baılanystarymen, ǵasyrlar boıǵy tarıhymen, tilderdiń jaqyndyǵymen jáne tyǵyz baýyrlas tamyrymen baılanystymyz», – dedi M.Nurtileý.
Qyrǵyzstan TMD jáne EAEO aıasyndaǵy elimizdiń negizgi saýda seriktesteriniń biri. Qazaqstan únemi Qyrǵyzstannyń iri saýda seriktesteriniń «úshtigine» kiredi, dep tolyqtyrdy QR SІM basshysy.
Mınıstrler 2023 jyldyń 11 aıynda 1,3 mlrd AQSh dollaryn quraǵan ózara saýda ósiminiń oń dınamıkasyn quptady. Ekonomıkalyq áriptestikti keńeıtýge jáne ózara saýda kólemin 2 mlrd dollarǵa deıin jetkizý boıynsha birlesken jumysty jalǵastyrýǵa kelisti.
Óz kezeginde J.Kýlýbaev eki el arasyndaǵy qarym-qatynastar tereń odaqtas qatynastar sıpatyna ıe bola otyryp, sapaly jańa deńgeıge shyqqanyn rastady.
Ózara ınvestıtsııalardy tartý, kólik jáne logıstıka, energetıka, sý resýrstary, tsıfrlandyrý salalarynda, onyń ishinde birlesken jobalardy pysyqtaý jáne iske qosý jolymen ózara tıimdi yntymaqtastyqty keńeıtýge erekshe nazar aýdaryldy.
Mınıstrler halyqaralyq uıymdar aıasyndaǵy syndarly ózara is-qımyldy, tyǵyz yntymaqtastyqty jáne ózara qoldaýdy atap ótip, óńirlik jáne halyqaralyq kún tártibindegi ózekti máseleler boıynsha «saǵat teńesterdi».
Kelissózder qorytyndysy boıynsha Qazaqstan men Qyrǵyzstannyń syrtqy saıası vedomstvolary arasyndaǵy 2024-2026 jyldarǵa arnalǵan yntymaqtastyq baǵdarlamasyna qol qoıyldy.
QR Syrtqy ister mınıstri M.Nurtileý sondaı-aq Qýǵyn-súrgin qurbandaryna arnalǵan «Ata-Beııt» memorıaldyq keshenine jáne belgili qyrǵyz aqyny Chıngız Aıtmatovtyń qabirine gúl shoqtaryn qoıý rásimine qatysty.
