Qazaqstan men Qyrǵyzstan kásipkerleri Bishkekte bas qosty

ASTANA. KAZINFORM — Bishkekte Qazaqstan men Qyrǵyzstan kásipkerleriniń «KZ-KG Business Day» atty forýmy ótti. Jıynda eki eldiń bıznes ókilderi ınvestıtsııa tartý, franchaızıngti damytý, jańa naryqtarǵa shyǵý jáne birlesken jobalardy iske asyrý máselelerin talqylady. Bul týraly Kazinform agenttiginiń menshikti tilshisi habarlady.

Qazaqstan men Qyrǵyzstan kásipkerleri Bishkekte bıznes-alıans qurmaq
Foto: Gúlmıra Abdrahmanova/Kazinform

Bul — Business & Innovation Alliance aıasynda uıymdastyrylǵan alǵashqy kezdesý. Forým kásipkerlerge jańa iskerlik baılanystar ornatýǵa, seriktester men franshıza usynýshylardy tabýǵa jáne kórshiles eldiń naryǵyna shyǵýǵa múmkindik berdi.

«Іskerlik tanystyqtan birlesken jobalar men jańa naryqtarǵa deıin» taqyrybynda baıandama jasaǵan Qazaqstannyń Qyrǵyzstandaǵy Tótenshe jáne Ókiletti elshisi Abylqaıyr Sqaqov eki el kásipkerlerin jańa múmkindikter tóńireginde biriktirý mańyzdy ekenin atap ótti.

Qazaqstan men Qyrǵyzstan kásipkerleri Bishkekte bas qosty
Foto: Gúlmıra Abdrahmanova/Kazinform

Onyń aıtýynsha, mundaı kezdesýlerdiń maqsaty — qazaqstandyq jáne qyrǵyzstandyq kásipkerlerdiń baılanys ornatýymen ǵana shektelmeı, ortaq seriktestikter men jobalardy júzege asyrýyna jol ashý.

— Búginde Qazaqstan men Qyrǵyzstan kásipkerleriniń áleýetin biriktirip, ortaq múmkindikter keńistigin qalyptastyratyn ýaqyt keldi dep senemin, — dedi elshi.

Forým barysynda dıplomat bıznes-alıanstyń tsıfrlyq platformasyn alǵash ret tanystyrdy. Bul servıs kásipkerlerge, ınvestorlar men franchaızılerge Qazaqstan jáne Qyrǵyzstan naryqtary týraly aqparatqa, iskerlik baılanystarǵa jáne jobalardy damytýǵa qajetti ózge de resýrstarǵa tikeleı qol jetkizýge múmkindik beredi.

«Atameken» ulttyq kásipkerler palatasynyń Shaǵyn jáne orta bıznesti damytý komıtetiniń tóraǵasy, «LANZHOU COMPANY» JShS bas dırektory Gúlbaný Maıgarına forýmnyń eki el úshin mańyzy zor ekenin aıtty.

Qazaqstan men Qyrǵyzstan kásipkerleri Bishkekte bıznes-alıans qurmaq
Foto: Gúlmıra Abdrahmanova/Kazinform

— Forým aıasynda kásipkerler ózara tájirıbe almasyp, ınvestıtsııa men franchaızıng máselelerin talqylap jatyr. Qatysýshylar eki eldiń ekonomıkasyn damytý joldary jónindegi oılaryn ortaǵa salýda. Eger franshıza negizinde naryqqa shyǵýdyń biryńǵaı erejeleri qalyptassa, kásipkerler úshin jańa jobalardy iske qosý áldeqaıda jeńil bolar edi, — dedi ol.

Gúlbaný Maıgarınanyń pikirinshe, kásipkerler ózderiniń jetistikteri men qatelikterinen sabaq alyp, basqa naryqtarǵa senimdi túrde shyǵýy úshin osyndaı tájirıbe almasý alańdary qajet.

Ol shetelde qazaqstandyq jáne qyrǵyzstandyq kásipkerlerdi jeke-jeke elderdiń ókilderi retinde emes, Ortalyq Azııanyń birtutas óńiriniń ókilderi retinde qabyldaıtynyn atap ótti. Osyǵan baılanysty eki el arasyndaǵy yntymaqtastyq pen iskerlik baılanysty nyǵaıtýǵa shaqyrdy.

Qyrǵyzstandyq kásipker, AITIM Group IT-holdınginiń negizin qalaýshy ári bas dırektory Tımýr Tılenov bıylǵy forýmnyń burynǵy kezdesýlerden ereksheligine toqtaldy.

— Buǵan deıin kásipkerler men memlekettik organdardyń kezdesýleri bólek ótetin. Al búgingi forýmda bıznes ókilderimen birge memlekettik organdardyń ókilderi de qatysyp otyr. Іs-sharanyń basty ereksheligi — kásipkerlerdiń bılik ókilderine tikeleı suraq qoıyp, máselelerdi sol jerde talqylaı alýynda, — dedi ol.

Tımýr Tılenovtiń pikirinshe, aqparattyq tehnologııalar salasynyń qarqyndy damýy Qazaqstan, Qyrǵyzstan jáne Ózbekstanǵa halyqaralyq naryqta básekege qabiletti ónim ázirleýge múmkindik berip otyr. Óńir elderindegi talantty mamandar men jasandy ıntellekt quraldaryn tıimdi paıdalaný arqyly álemdik naryqqa arnalǵan tehnologııalyq sheshimder jasaýǵa bolady.

— Biz batystyq kompanııalarmen bir ónim úshin birneshe tsent deńgeıinde básekelese alamyz. Ár eldiń ózindik artyqshylyǵy bar. Qazaqstanda kapıtal men tájirıbe mol, Ózbekstannyń halqy kóp, al Qyrǵyzstan derekter ortalyqtaryna arnalǵan qolaıly ınfraqurylymymen erekshelenedi. Osy múmkindikterdi biriktirip, búkil álem qoldanatyn tehnologııalyq sheshimder ázirleýge bolady, — dedi kásipker.

Forýmnan kúter úmiti týraly aıtqan Tımýr Tılenov Qazaqstan men Qyrǵyzstan kásipkerlerine yntymaqtastyqty kúsheıtetin kez kelgenin jetkizdi. Onyń sózinshe, eki eldiń geografııalyq jaqyndyǵy men mentalıtetiniń uqsastyǵy bıznestiń damýyna qolaıly jaǵdaı qalyptastyrady.

Qazaqstan men Qyrǵyzstan kásipkerleri Bishkekte bıznes-alıans qurmaq
Foto: Gúlmıra Abdrahmanova/Kazinform

— Biz jyl saıyn bızneske jol ashyp, bir-birimizben básekeleskennen góri, yntymaqtasa jumys istep, túrli salalardy birge damytýymyz kerek, — dep túıindedi ol.

Aıta keteıik, buǵan deıin Qazaqstan men Qyrǵyzstannyń II óńiraralyq yntymaqtastyq forýmy aıasynda eki el kásipkerleri jalpy somasy 100 mıllıon dollarǵa jýyq kelisimsharttarǵa qol qoıǵan bolatyn.